தவறவிடாதீர்கள்..!உடனே பதிவு செய்யுங்கள்

(எம்.மனோசித்ரா)

கொழும்பு நுகர்வோர் விலைச் சுட்டெண்ணை அடிப்படையாகக் கொண்ட பணவீக்கம் 25.2 சதவீதமாகவும், உணவுப்பணவீக்கம் 21.5 சதவீதமாக வீழ்ச்சியடைந்துள்ளது. 

ஏப்ரலில் பணவீக்கமானது 35.3 சதவீதமாகவும், உணவுப்பணவீக்கம் 30.6 சதவீதமாகவும் காணப்பட்ட நிலையிலேயே மே மாதத்தில் சாதகமான வீழ்ச்சி பதிவாகியுள்ளது.

முதன்மைப் பணவீக்கத்தின் இவ்வீழ்ச்சியானது, பரந்தளவில் இலங்கை மத்திய வங்கியினால் 2023 ஏப்ரலில் எதிர்பார்க்கப்பட்ட பணவீக்க வீழ்ச்சிப் பாதைக்கு அமைவாகக் காணப்படுவதாக மத்திய வங்கி தெரிவித்துள்ளது.

உணவுப் பணவீக்கமானது ஏப்ரலில் 30.6 சதவீதத்திலிருந்து மே மாதத்தில் 21.5 சதவீதத்திற்கு வீழ்ச்சியடைந்துள்ளது. அதேவேளை உணவல்லாப் பணவீக்கம் ஏப்பிரலில் 37.6 சதவீதத்திலிருந்து 27 சதவீதத்திற்கு வீழ்ச்சியடைந்துள்ளது.

கொழும்பு நுகர்வோர் விலைச்சுட்டெண்ணின் மாதாந்த மாற்றம் மே மாதத்தில் - 0.02 சதவீதத்தைப் பதிவுசெய்துள்ளது. இச்சிறிய மாதாந்த மாற்றத்திற்கு 0.53 சதவீதமாகவிருந்த உணவு வகையில் அவதானிக்கப்பட்ட விலை அதிகரிப்புக்கள் மூலம் - 0.56 சதவீதமாகவிருந்த உணவல்லா வகையிலுள்ள பொருட்களில் அவதானிக்கப்பட்ட விலை வீழ்ச்சிகளின் எதிரீடு காரணமாக அமைந்ததாக மத்திய வங்கி குறிப்பிட்டுள்ளது.

பொருளாதாரத்தின் அடிப்படை பணவீக்கத்தினைப் பிரதிபலிக்கின்ற மையப் பணவீக்கம் ஏப்ரலில் 27.8 சதவீதத்திலிருந்து மே மாதம் 20.3 சதவீதமாக வீழ்ச்சியடைந்துள்ளது. 

அதற்கமைய பணவீக்கத்தின் வீழ்ச்சிப் போக்கானது முன்கூட்டியே ஊகிக்கப்பட்டதைவிட விரைவாக இவ்வாண்டின்  3 ஆம் காலாண்டில் ஒற்றை இலக்க மட்டங்களை நோக்கி பணவீக்கத்தினை தொடர்ந்தும் குறைவடையச்செய்யுமென எதிர்பார்க்கப்படுகின்றது.

இறுக்கமான நாணய மற்றும் இறைக் கொள்கைகளின் காலங்கடந்த தாக்கம், இலங்கை ரூபாய் வலுவடைதல், எரிபொருள் மற்றும் எரிவாயு விலைகளில் குறைவு, உணவு விலைகள் இயல்பு நிலைக்குத் திரும்புதல் அத்துடன்  சாதகமான புள்ளிவிபரத் தளத்தாக்கத்தின் விளைவு என்பன மூலம் பணவீக்கம் வீழ்ச்சிப் போக்கில் செல்வதாக மத்திய வங்கி மேலும் தெரிவித்துள்ளது.