தவறவிடாதீர்கள்..!உடனே பதிவு செய்யுங்கள்

உதயநிதி ஸ்டாலின் கதையின் நாயகனாக நடிக்கும் 'மாமன்னன்' எனும் திரைப்படத்தில் இடம் பெற்ற 'ஜிகு ஜிகு ரயிலு..' எனும் இரண்டாவது பாடல் வெளியிடப்பட்டிருக்கிறது. இந்த பாடலுடன் லிரிக்கல் வீடியோவும், ஏ. ஆர். ரகுமான் தோன்றி பாடும் பிரத்யேக காணொளியும் வெளியிடப்பட்டிருக்கிறது.

இயக்குநர் மாரி செல்வராஜ் இயக்கத்தில் தயாராகி இருக்கும் புதிய திரைப்படம் 'மாமன்னன்'. இதில் உதயநிதி ஸ்டாலின், 'வைகைப்புயல்' வடிவேலு, பகத் பாசில், கீர்த்தி சுரேஷ் உள்ளிட்ட பலர் நடித்திருக்கிறார்கள். தேனி ஈஸ்வர் ஒளிப்பதிவு செய்திருக்கும் இந்த திரைப்படத்திற்கு 'இசைப்புயல்' ஏ. ஆர். ரகுமான் இசையமைத்திருக்கிறார். இந்த திரைப்படத்தை ரெட் ஜெயன்ட் மூவிஸ் நிறுவனம் தயாரித்திருக்கிறது.

இந்தத் திரைப்படத்தின் ஃபர்ஸ்ட் லுக், செகண்ட் லுக், சிங்கிள் ட்ராக் ஆகியவை வெளியாகி பெரும் வரவேற்பை பெற்றிருக்கிறது. இந்நிலையில் இத்திரைப்படத்தில் இடம்பெற்ற 'ஜிகு ஜிகு ரயிலு..' என தொடங்கும் பாடல் வெளியாகி இருக்கிறது. பாடலாசிரியர் யுகபாரதி எழுதியிருக்கும் இந்த பாடலை இசையமைப்பாளரான ஏ ஆர் ரகுமான் பாடியிருக்கிறார். 'ராசா கண்ணு' என்ற முதல் பாடலைப் போலவே.. இந்த பாடலும் வித்தியாசமாக அமைந்திருப்பதால் ரசிகர்களின் கவனத்தை கவர்ந்திருக்கிறது.