தவறவிடாதீர்கள்..!உடனே பதிவு செய்யுங்கள்

(எம்.மனோசித்ரா)

உத்தேச புதிய பயங்கரவாத எதிர்ப்பு சட்ட மூலத்தினை நாளை மறுதினம் செவ்வாய்கிழமை பாராளுமன்றத்தில் சமர்ப்பிக்க எதிர்பார்த்துள்ளதாக  நீதி, சிறைச்சாலைகள் அலுவல்கள் மற்றும் அரசியலமைப்பு மறுசீரமைப்பு அமைச்சர் விஜேதாச ராஜபக்ஷ தெரிவித்தார்.

உத்தேச புதிய பயங்கரவாத எதிர்ப்பு சட்ட மூலம் அச்சுறுத்தல் மிக்கதாகும் என்றும் குறித்த சட்டம் நடைமுறைப் படுத்தப்பட்டால் ஜனநாயகம் குறித்து பேசும் அனைவரும் கைது செய்யப்படுவர் என்றும் எதிர்க்கட்சிகள் உள்ளிட்ட பல்வேறு தரப்பினரால் தெரிவிக்கப்பட்டு வருகிறது.

பாராளுமன்றத்திற்குள்ளும் , வெளியிடும் இதற்கு எதிரான போராட்டங்களை முன்னெடுக்க தயாராகவுள்ளதாகவும் எதிர்க்கட்சிகள் அறிவித்துள்ளன. எனினும் எதிர்க்கட்சிகள் கூறும் ஏற்பாடுகள் எவையும் குறித்த சட்ட மூலத்தில் உள்ளடக்கப்படவில்லை என அரசாங்கம் மறுப்பு தெரிவித்துள்ளது. இந்நிலையிலேயே அமைச்சர் விஜேதாச ராஜபக்ஷ மேற்கண்டவாறு தெரிவித்துள்ளார்.

புதிய பயங்கரவாத எதிர்ப்பு சட்ட மூலத்தினை 4ஆம் திகதி பாராளுமன்றத்தில் சமர்ப்பிக்க எதிர்பார்த்துள்ளோம். ஒன்றன் பின் ஒன்றாக பல சட்ட மூலங்கள் சமர்ப்பிக்கப்படவுள்ளன. இவை மேன்முறையீட்டுக்கு உட்படுத்தப்படும் போது நீதிமன்ற நடவடிக்கைகளிலும் சிக்கல்கள் ஏற்படக் கூடும். அவற்றின் அடிப்படையிலேயே இவை தொடர்பான அடுத்த கட்ட நடவடிக்கைகள் எடுக்கப்படும் என விஜேதாச ராஜபக்ஷ மேலும் குறிப்பிட்டுள்ளார்.