தவறவிடாதீர்கள்..!உடனே பதிவு செய்யுங்கள்

விமானப்படையின் முன்னாள்  அதிகாரியை கறுப்புபட்டியலில் சேர்த்துள்ளதை இலங்கை விமானப்படை நியாயப்படுத்தியுள்ளது.

எந்தவொரு அரசியல் தலையீடும் இன்றி உள்நிர்வாகத்தை முன்னெடுப்பதை நோக்கமாக கொண்டே  இந்த நடவடிக்கையை எடுத்துள்ளதாக இலங்கை விமானப்படையின் ஊடக இயக்குநர் துசான் விஜயசிங்க தெரிவித்துள்ளார்.

கறுப்பு பட்டியலில் சேர்க்கப்பட்டுள்ள ஓய்வுபெற்ற எயர்வைஸ் மார்சல் சம்பத் துயாகொந்த எந்த முகாமுக்கும் தளத்திற்கும் செல்ல முடியாது என தெரிவித்துள்ள விமானப்படை பேச்சாளர் விமானப்படையின் வசதிகள் எதனையும் அனுபவிக்க முடியாது எனவும் குறிப்பிட்டுள்ளார்.

விமானப்படையின் ஓய்வு பெற்ற அதிகாரியொருவர் வழமையாக அரசியலில் ஈடுபடலாம் ஆனால் இந்த விடயம் வித்தியாசமானது என தெரிவித்துள்ள  விமானப்படையின் பேச்சாளர் இந்த அதிகாரி விமானப்படையின் அனைத்து சலுகைகளையும் அனுபவிக்கின்றார் எனவும் குறிப்பிட்டுள்ளார்.

இதன் காரணமாக இவர் எங்கள் முகாம்களிற்குள் நுழைந்து ஏனைய விமானப்படையினரை தனது செல்வாக்கிற்கு உட்படுத்த முயன்றால்அதனால் பிரச்சினைகள் ஏற்படும் எனவும் விமானப்படை பேச்சாளர் தெரிவித்துள்ளார்.

தேசிய மக்கள் சக்தியுடன் இணைந்து செயற்படுகின்றார் என்பதற்காக அரசாங்கம் ஓய்வுபெற்ற விமானப்படை அதிகாரியொருவரை அரசாங்கம் கறுப்பு பட்டியலில் சேர்த்துள்ளது என குற்றச்சாட்டுகள் எழுந்துள்ளன.

தேசிய மக்கள் சக்தியின் ஹர்சனநாணயக்கார இந்த குற்றச்சாட்டை முன்வைத்துள்ளார்.

தேசிய மக்கள் சக்தி கட்சிக்குள் முன்னாள் இராணுவவீரர்கள் பிரிவொன்றை உருவாக்கியுள்ளது என தெரிவித்துள்ள ஹர்சன ராஜகருண இந்த பிரிவில் இணைந்துகொண்டமைக்காக முன்னாள் விமானப்படை அதிகாரி  எயர்வைஸ்மார்சல் சம்பத் துயாகொந்தவை அரசாங்கம் தடைசெய்துள்ளது என குறிப்பிட்டுள்ளார்.

ஓய்வுபெற்ற அதிகாரியொருவருக்கு தனது தனிப்பட்ட விடயங்களை தெரிவு செய்வது அடிப்படை உரிமை என ஹர்சன ராஜகருண தெரிவித்துள்ளார்.

என்ன காரணத்திற்காக முன்னாள் விமானப்படை அதிகாரி கறுப்புபட்டியலில் இணைக்கப்பட்டார் என அவர் கேள்வி எழுப்பியுள்ளார்.

அவருக்கு எதிராக என்ன குற்றச்சாட்டுகள் சுமத்தப்பட்டுள்ளன என்ன விசாரணைகள் இடம்பெறுகின்றன எனவும் கேள்வி எழுப்பியுள்ள ஹர்சன ராஜகருண கறுப்பு பட்டியலில் இணைக்கப்பட்டமை குறித்து முன்னாள் அதிகாரிக்கு உத்தியோகபூர்வமாக அறிவிக்கப்படவில்லை எனவும் குறிப்பிட்டுள்ளார்.

இலங்கையின்உள்நாட்டு யுத்தத்தின்போது எம்ஐ24 ஹெலிக்கொப்டர் படையணியின் விமானியாக பணியாற்றியவரே கறுப்பு பட்டியலில் சேர்க்கப்பட்டுள்ளார்.