தவறவிடாதீர்கள்..!உடனே பதிவு செய்யுங்கள்

உள்ளூராட்சி சபைகளுக்கான தேர்தலை நடத்துவதா இல்லையா என்ற பொதுநிலை விவாதம் ஓர் அரசியல் பிரச்சினையாக்கப்பட்டிருக்கின்றது. இது இலங்கை அரசியல் அரங்கத்தில் பேரதிர்வுகளை ஏற்படுத்தி உள்ளது. உள்ளூராட்சி மன்றத் தேர்தல் நடத்தப்படுமா இல்லையா என்பது ஒரு புறமிருக்க இந்த விவகாரம் நீதித்துறை, சட்டவாக்கத்துறை நிறைவேற்றுத்துறை ஆகிய மும்முனைகளில் நிலைகொண்டு பாராளுமன்றத்தில் பெரும் புயலாக மாறி இருக்கின்றது. இந்த அரசியல் அரங்கப் புயலானது உச்ச நீதிமன்றம் வழங்கிய அதிரடியான தடையுத்தரவு தீர்ப்பில் உருவாகி சட்டவாக்கத்துறையும், நிறைவேற்றுத்துறையும் களையாடத் தொடங்கியிருக்கின்றன என்றே கூற வேண்டும். சட்டவாக்கத்துறைக்கும், நிறைவேற்றுத்துறைக்கும் உள்ள வலுவேறாக்கல் அதிகார உரிமைக்கான எல்லைகளைக் கடந்து அரசு சார்ந்த கட்சிகளின் சுய அரசியல் இலாபத்தையே இது இலக்காகக் கொண்டிருக்கின்றது. இது கவலைக்குரியது. நாட்டின் பாரம்பரிய ஜனநாயக ஆட்சியியலை தரக்குறைவான நிலையை நோக்கித் தள்ளியிருக்கின்றது. ஆசியாவின் குறிப்பிட்ட ஜனநாயக அடையாளத்தைக் கொண்டிருந்த இலங்கையை உலக நாடுகளுக்குத் தவறானதொரு முன்னுதாரண நிலைமைக்கு உந்தித் தள்ளிச் செல்வதற்கு முயன்றிருக்கின்றது. நாடு இப்பொழுது மோசமான பொருளாதார நெருக்கடியில் சிக்கி இருக்கின்றது.