தவறவிடாதீர்கள்..!உடனே பதிவு செய்யுங்கள்

(என்.வீ.ஏ.)

றோயல் செலஷ்சர்ஸ் பெங்களூர் அணிக்கு எதிரான இந்திய மகளிர் பிறீமியர் லீக் (WPL) இருபது 20 கிரிக்கெட் போட்டியில் அணித் தலைவி மெக் லெனிங், ஷஃபாலி வர்மா ஆகியோரின் சாதனைமிகு ஆரம்ப இணைப்பாட்டமும் அமெரிக்க வீராங்கனை தாரா நொரிஸின் துல்லியமான பந்துவீச்சும் டெல்ஹி கெப்பிட்டல்ஸ் அணிக்கு 60 ஓட்ட வெற்றியை ஈட்டிக்கொடுத்தன.

அப் போட்டியில் முதலில் துடுப்பெடுத்தாட அழைக்கப்பட்ட டெல்ஹி கெப்பிட்டல்ஸ் 20 ஓவர்களில் 2 விக்கெட்களை மாத்திரம் இழந்து 223 ஓட்டங்களைக் குவித்தது.

மெக் லெனிங், ஷஃபாலி வர்மா ஆகிய இருவரும் அதிரடி வேகத்தில் துடுப்பெடுத்தாடி 87 பந்துகளில் சாதனை மிகு 162 ஓட்டங்களைப் பகிர்ந்து பலமான ஆரம்பத்தை இட்டுக்கொடுத்தனர்.

ஆனால், இருவரும் ஹீதர் நைட்டின் ஒரே ஓவரில் ஆட்டமிழந்தனர்.

முதலில் ஆட்டம் இழந்த மெக் லெனிங் 43 பந்துகளை எதிர்கொண்டு 14 பவுண்டறிகளுடன் 72 ஓட்டங்களையும் அடுத்து ஆட்டம் இழ்ந்த ஷஃபாலி வர்மா 45 பந்துகளை எதிர்கொண்டு 10 பவுண்டறிகள், 4 சிக்ஸ்களுடன் 84 ஓட்டங்களையும் விளாசினர்.

அவர்களுக்கு பின்னர்   மாரிஸ்ஆன் கெப் 17 பந்துகளில் 3 பவுண்டறிகள், 3 சிக்ஸ்கள் உட்பட 39 ஓட்டங்களுடனும் ஜெமிமா ரொட்றிகஸ் 15 பந்துகளில் 3 பவுண்டறிகள் அடங்கலாக 22 ஓட்டங்களுடனும் ஆட்டமிழக்காதிருந்தனர்.

பந்தவீச்சில் ஹீதர் நைட் 40 ஓட்டங்களுக்கு 2 விக்கெட்களைக் கைப்பற்றினார்.

224 ஓட்டங்களை வெற்றி இலக்காகக் கொண்டு பதிலுக்கு துடுப்பெடுத்தாடிய றோயல் செலஞ்சர்ஸ் பெங்களூர் 20 ஓவர்களில் 8 விக்கெட்களை இழந்து 163 ஓட்டங்களைப் பெற்றது.

அணித் தலைவி ஸ்ம்ரித்தி மந்தனா (35), ஹீதர் நைட்(34), எலிஸ் பெரி (31) ஆகிய மூவரே திறமையாகத் துடுப்பெடுத்தாடி 30 ஓட்டங்களுக்கு மேல் பெற்றனர்.

பந்துவீச்சில் தாரா நொரிஸ் 29 ஓட்டங்களுக்கு 5 விக்கெட்களையும் அலிஸ் கெப்சி 10 ஓட்டங்களுக்கு 2 விக்கெட்களையும் கைப்பற்றினர்.