தவறவிடாதீர்கள்..!உடனே பதிவு செய்யுங்கள்

(என்.வீ.ஏ.)

சிட்னி 2000 ஒலிம்பிக்கில் வெள்ளிப் பதக்கம் வென்ற சுசந்திகா ஜயசிங்கவை மகளிர் கிரிக்கெட் வழிகாட்டியாகவும் மேம்பாட்டு ஆலோசகராகவும் ஸ்ரீ லங்கா கிரிக்கெட் நிறுவனம் நியமித்துள்ளது.

சமகால மற்றும் எதிர்கால மகளிர் கிரிக்கெட் தலைமுறையினரை ஊக்குவிக்கும் வகையில் அவர்களுடன் தனது மன உறுதியையும் விளையாட்டுத்துறையில் தான் கொண்டிருந்த அர்ப்பணிப்புத் தன்மையையும் இலங்கையின் அதிசிறந்த முன்னாள் மெய்வல்லுநர் வீராங்கனை சுசந்திகா ஜயசிங்க பகிர்ந்துகொள்வார் என ஸ்ரீ லங்கா கிரிக்கெட் நிறுவனம் தெரிவித்தது.

இலங்கையில் மிகவும் அலங்கரிக்கப்பட்ட வீராங்கனைகளில் ஒருவரும், தேசத்திற்காக ஒலிம்பிக் பதக்கம் வென்ற ஒரே ஒரு வீராங்கனையும், மகளிருக்கான குறுந்தூர ஓட்டப் போட்டியில் ஆசியாவிலேயே ஒலிம்பிக் பதக்கம் ஒரே ஒரு வீராங்கனையும் சுசந்திகா ஜயசிங்க ஆவார்.

இந்த நியமனம் குறித்து கருத்து வெளியிட்ட சுசந்திகா ஜயசிங்க, 'இந்த புதிய சவால் குறித்து நான் பூரிப்டைகின்றேன்.

ஏனெனில் இளம் பெண்களை  கிரிக்கெட்   விளையாட்டில் ஈடுபடுத்துவதற்கும் சவால்களை சமாளிப்பதற்கும் நான் உதவும் அதேவேளை அவர்களை எதிர்கால நட்சத்திரங்களாக பிரகாசிக்கச் செய்வேன்' எனக் குறிப்பிட்டார்.

இலங்கை மகளிர் கிரிக்கெட்டில் சுசந்திகா ஜயசிங்க பெறுமதிமிக்கவராக திகழ்வார் என்பதை மனதில் கொண்டு அவரை வரவேற்பதாக ஸ்ரீலங்கா கிரிக்கெட் நிறுவனம் தெரிவித்தது.  

பெப்ரவரி முதலாம் திகதியிலிருந்து அமுலுக்கு வரும் வகையில் சுசந்திகாவை மகளிர் கிரிக்கெட் மேம்பாட்டு ஆலோசகராக ஸ்ரீ லங்கா கிரிக்கெட் நிறுவனம் நியமித்துள்ளது.