தவறவிடாதீர்கள்..!உடனே பதிவு செய்யுங்கள்

'மக்கள் செல்வன்' விஜய் சேதுபதி, பொலிவுட் நடிகர் ஷாகித் கபூர் கதையின் நாயகர்களாக நடித்திருக்கும் 'ஃபார்ஸி' எனும் வலைத்தள தொடர் எதிர்வரும் பெப்ரவரி மாதம் 10ஆம் திகதியன்று அமேசான் ப்ரைம் வீடியோ டிஜிட்டல் தளத்தில் வெளியாகும் என அதிகாரபூர்வமாக அறிவிக்கப்பட்டிருக்கிறது.

'தி ஃபேமிலி மேன்' எனும் வலைத்தள தொடரை இயக்கி டிஜிட்டல் தள உலகில் புகழ்பெற்ற முன்னணி இரட்டை இயக்குநர்களான ராஜ் மற்றும் டி.கே ஆகியோரின் இயக்கத்தில் தயாராகியிருக்கும் 'ஃபார்ஸி' தொடரில் விஜய் சேதுபதி, ஷாகித் கபூர், கே.கே.மேனன், ராசி கண்ணா, ரெஜினா கஸண்ட்ரா, புவன் அரோரா, அமோல் பலேகர் உள்ளிட்ட பலர் நடித்திருக்கிறார்கள். சஸ்பென்ஸ், க்ரைம், த்ரில்லர் ஜேனரில் உருவாகியிருக்கும் 8 அத்தியாயங்கள் கொண்ட இந்த தொடரை அமேசான் ப்ரைம் டிஜிட்டல் தளத்துக்காக டி 2 ஆர் ஃபிலிம்ஸ் என்னும் நிறுவனம் சார்பில் இயக்குநர்கள் ராஜ் மற்றும் டி.கே தயாரித்திருக்கிறார்கள். 

இந்த வலைத்தள தொடருக்கான கதையை இயக்குநர்கள் ராஜ் மற்றும் டி.கேயுடன் இணைந்து ஆர்.சீதா, சுமன் குமார் மேனன் ஆகியோர் எழுதியிருக்கிறார்கள். 

பணக்காரர்களுக்கு ஆதரவாக செயல்படும் அமைப்புக்கு பாடம் கற்பிக்க நினைக்கும் சமூகத்தின் பின்தங்கிய நிலையில் உள்ள புத்திசாலி தெருக்கலைஞன் ஒருவரை சுற்றி நடக்கும் கதையாக இது தயாராகியுள்ளது. 

இதனிடையே 'ஃபார்ஸி' தொடர் ஹிந்தி மொழியில் நேரடியாக தயாராகியிருந்தாலும், தமிழ், தெலுங்கு உள்ளிட்ட இந்திய மொழிகளில் டப்பிங் செய்யப்பட்டு வெளியாகிறது என்பதும், விஜய் சேதுபதி ஹிந்தி பேசி நடித்திருக்கும் வலைத்தள தொடர் என்பதால் தொடருக்கான எதிர்பார்ப்பு அதிகரித்திருக்கிறது என்பதும் குறிப்பிடத்தக்கது.