தவறவிடாதீர்கள்..!உடனே பதிவு செய்யுங்கள்

அஜித் குமார் நடிப்பில் தயாராகி இருக்கும் 'துணிவு' எனும் திரைப்படத்தின் முன்னோட்டம் வெளியிடப்பட்டிருக்கிறது. இந்த முன்னோட்டம் வெளியான 24 மணி தியாலத்தில் 25 மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனை படைத்திருக்கிறது.

இயக்குநர் ஹெச். வினோத் இயக்கத்தில் தயாராகி இருக்கும் புதிய திரைப்படம் 'துணிவு'. இம்மாதம் பன்னிரண்டாம் திகதியன்று உலகம் முழுவதும் பட மாளிகைகளில் வெளியாகவிருக்கும் இந்த திரைப்படத்தின் முன்னோட்டம் புத்தாண்டை முன்னிட்டு, கடந்த ஆண்டின் இறுதி நாளன்று மாலை ஏழு மணி அளவில் வெளியிடப்பட்டது. பெரும் எதிர்பார்ப்பிற்கிடையே வெளியான இந்த 'துணிவு' திரைப்படத்தின் முன்னோட்டம், எக்சன் ரசிகர்களுக்கு  விருந்தாக அமைந்தது. அஜித் குமார் வில்லனாக நடித்திருக்கும் காட்சிகள்.., அவருடைய அசால்ட்டான நடிப்பு.., எக்சன் காட்சிகள்.. என பரபரப்பும், விறுவிறுப்பும் நிறைந்திருந்தது.

இந்த முன்னோட்டம் உலக அளவில் புதிய சாதனையையும் படைத்திருக்கிறது. மலேசிய நாட்டில் 'துணிவு' திரைப்படத்தின் முன்னோட்டம் ஹாலோகிராம் எனும் தொழில்நுட்பத்தில் வெளியிடப்பட்டது. உலகத்திலேயே ஒரு திரைப்படத்தின் முன்னோட்டம் இத்தகைய தொழில்நுட்பத்தில் வெளியிடுவது இதுதான் முதல் முறை என்பதால், அஜித்தின் ரசிகர்கள் இதனை இணையத்தில் வைரலாக்கி கொண்டாடி வருகிறார்கள்.

'துணிவு' திரைப்படத்தில் அஜித் குமாருடன் மஞ்சு வாரியர், சமுத்திரக்கனி, பிரேம்குமார் உள்ளிட்ட பலர் நடித்திருக்கிறார்கள். நிரவ் ஷா ஒளிப்பதிவு செய்திருக்கும் இந்த திரைப்படத்திற்கு ஜிப்ரான் இசை அமைத்திருக்கிறார். வங்கிக் கொள்ளையை மையப்படுத்தி தயாராகி இருக்கும் இந்த திரைப்படத்தை பே வியூ ப்ராஜெக்ட்ஸ் எல்எல்பி என்ற நிறுவனமும், ஜீ ஸ்டுடியோஸ் எனும் நிறுவனமும் இணைந்து தயாரித்திருக்கிறது.