தவறவிடாதீர்கள்..!உடனே பதிவு செய்யுங்கள்

(இராஜதுரை ஹஷான், எம்.ஆர்.எம்.வசீம்)

பொதுஜன பெரமுன தலைமையிலான எமது அரசாங்கம் எடுத்த ஒருசில தீர்மானங்களினால் ஏற்பட்ட பாதிப்பிற்கு அரசியல் ரீதியில் நட்டஈடு செலுத்தியுள்ளோம்.

இழைக்கப்பட்ட தவறுகளை திருத்திக் கொள்வதற்காகவே ஜனாதிபதி ரணில் விக்கிரமசிங்க தலைமையில் அரசாங்கம் தோற்றுவிக்கப்பட்டது.

எம்மால் இழைக்கப்பட்ட தவறுகளை நாம் பகிரங்கமாக ஏற்றுக் கொள்கிறோம் என கைத்தொழில் மற்றும் பெருந்தோட்டத்துறை அபிவிருத்தி அமைச்சர் ரமேஷ் பத்திரண தெரிவித்தார்.

பாராளுமன்றத்தில் வியாழக்கிழமை (நவ.17) இடம்பெற்ற 2023 ஆம் ஆண்டுக்கான வரவு செலவுத் திட்டத்தின் இரண்டாம் வாசிப்பு மீதான முன்றாம் நாள் விவாதத்தில் உரையாற்றுகையில் மேற்கண்டவாறு குறிப்பிட்டார்.

அவர் மேலும் குறிப்பிட்டதாவது:

முன்னாள் பிரதமர் மஹிந்த ராஜபக்ஷ கடந்த மே மாதம் 9 ஆம் திகதி பதவி விலகியவுடன் பொதுஜன பெரமுன தலைமையிலான  அமைச்சரவை முழுமையாக பதவி விலகியது.

அரசாங்கத்தை பொறுப்பேற்குமாறு அப்போதைய ஜனாதிபதி கோட்டபய ராஜபக்ஷ எதிர்க்கட்சி தலைவர் சஜித் பிரேமதாஸவிற்கு பலமுறை அழைப்பு விடுத்தார். அரசாங்கத்தை பொறுபேற்கும் சவாலை எதிர்க்கட்சி தலைவர் அப்போது ஏற்கவில்லை.

பொதுஜன பெரமுன தலைமையிலான எமது அரசாங்கம் எடுத்த ஒருசில பிரபல்யமான தீர்மானங்களுக்கு இன்று அரசியல் நட்டஈடு செலுத்துகிறோம்.

இழைத்த தவறுகளை திருத்திக் கொள்வதற்காக ஐக்கிய தேசிய கட்சியின் தலைவர் ரணில் விக்கிரமசிங்கவை ஜனாதிபதியாக்கினோம்.

2019 ஆம் ஆண்டு ஆட்சிமாற்றம் ஏற்பட்டதை தொடர்ந்து எமது அரசாங்கம்  55 000 பட்டதாரிகளுக்கு அரச தொழில்வாய்ப்புக்களையும் குறைந்த கல்வி தகைமை உடைய 40 000 பேருக்கு அரச தொழில்வாய்ப்புக்களை வழங்கும் வகையில் பிரபல்யமான தீர்மானத்தை எடுத்தது. இது பொருளாதார பாதிப்பை தீவிரப்படுத்தியது.

அத்துடன்  2019 ஆம் ஆண்டு வரிச் சலுகை வழங்கப்பட்டமையால் பொருளாதார பாதிப்பு மேலும் தீவிரமடைந்தது. பொருளாதார பாதிப்பு நடுத்தர மக்களுக்கு நேரடியாக தாக்கம் செலுத்தியது.

பணவீக்கம் அதிகரிப்பினால் அத்தியாவசிய பொருட்களின் விலைகள் சடுதியாக அதிகரிக்கப்பட்டன. அரசாங்கத்தின் தவறுகளை திருத்திக் கொள்ளும் பொறுப்பை ஜனாதிபதி ரணில் விக்கிரமசிங்கவிடம் ஒப்படைத்து அவரது செயற்பாடுகளுக்கு முழுமையான ஒத்துழைப்பு வழங்கியுள்ளோம்.

கடந்த மாதங்களை விட தற்போது பணவீக்கம், உணவு பணவீக்கம் மற்றும் உணவல்லா பணவீக்கம் சடுதியாக குறைவடைந்து செல்கின்றன.

சர்வதேச நாணய நிதியத்தின் ஒத்துழைப்பை பெற்றுக்கொள்வதற்கான பேச்சுவார்த்தையை இவ்வருட இறுதிக்குள் நிறைவு செய்ய எதிர்பார்க்கப்பட்டுள்ளது.

நாணய நிதியத்தின் ஒத்துழைப்பை பெற்றுக்கொண்டால் பொருளாதார பாதிப்பிற்கு தீர்வு காணலாம். அத்துடன் சர்வதேச நிதி நிறுவனங்களின் நம்பிக்கையை பெற்றுக்கொள்ளலாம்.

பொருளாதார பாதிப்பிற்கு அரச கடன்சுமை பிறிதொரு காரணியாக காணப்படுகிறது. இலங்கையின் அரசமுறை கடன் 52 பில்லியன் அமெரிக்க டொலர்களாக காணப்படுகிறது.

2019 ஆம் ஆண்டுக்கு பின்னர் 3 பில்லியன் அமெரிக்க டொலர் அரசமுறை கடன் செலுத்தப்பட்டுள்ளது. அரசமுறை கடன் மறுசீரமைக்கப்பட வேண்டும்.

குறுகிய அரசியல் நோக்கத்தை முன்னிலைப்படுத்தி பொருளாதார மீட்சிக்கான நடவடிக்கைகளுக்கு பாதிப்பு ஏற்படுத்த வேண்டாம் என்று எதிர்க்கட்சியிடம் வலியுறுத்துகிறோம்.

சர்வதேச நாணய நிதியத்தின் ஒத்துழைப்பை பெற்றுக்கொள்வதில் பாதிப்பு ஏற்பட்டால் அது சமூக கட்டமைப்பில் பாரிய எதிர்விளைவை தோற்றுவிக்கும் என்றார்.