தவறவிடாதீர்கள்..!உடனே பதிவு செய்யுங்கள்

சிறிய இடைவெளிக்கு பிறகு 'வைகைப்புயல்' வடிவேலு  கதையின் நாயகனாக முதன்மையான கதாபாத்திரத்தில் நடித்திருக்கும் 'நாய் சேகர் ரிட்டன்ஸ்' எனும் படத்தில், இசையமைப்பாளர் சந்தோஷ் நாராயணன் இசையில், 'வைகைப்புயல்' வடிவேலு பாடிய 'அப்பத்தா..' எனத் தொடங்கும் முதல் பாடல் வெளியிடப்பட்டிருக்கிறது.

தமிழ் திரையுலகின் முன்னணி கொமர்ஷல் இயக்குநரான சுராஜ் இயக்கத்தில் தயாராகி இருக்கும் புதிய திரைப்படம் 'நாய் சேகர் ரிட்டன்ஸ்'.

இதில் வடிவேலு கதையின் நாயகனாக நடிக்க, அவருக்கு ஜோடியாக நடிகை சிவாங்கி கிருஷ்ணகுமார் நடிக்கிறார். இவர்களுடன் ரெடின் கிங்ஸ்லி, முனீஸ்காந்த் உள்ளிட்ட பலர் நடித்திருக்கிறார்கள்.

விக்னேஷ் வாசு ஒளிப்பதிவு செய்திருக்கும் இந்த திரைப்படத்திற்கு சந்தோஷ் நாராயணன் இசையமைத்திருக்கிறார்.  பொழுதுபோக்கு அம்சங்களுடன் கூடிய கொமர்ஷல் ஜேனரில் தயாராகி இருக்கும் இந்த திரைப்படத்தை லைகா புரொடக்ஷன்ஸ் பிரம்மாண்டமான பொருட்செலவில் தயாரித்திருக்கிறது.

இப்படத்தின் படப்பிடிப்பு பணிகள் முழுமையாக நிறைவடைந்து தற்போது இறுதி கட்டப் பணிகள் விறுவிறுப்பாக நடைபெற்று வருகிறது. இந்நிலையில் இப்படத்தில் இடம்பெற்ற 'அப்பத்தா..' என தொடங்கும் பாடல் வெளியிடப்பட்டிருக்கிறது. இந்த பாடலை பாடலாசிரியர் துரை மற்றும் அசல் கோளாறு ஆகியோர் எழுதியிருக்க, 'வைகைப்புயல்' வடிவேலு தன் சொந்த குரலில் பாடியிருக்கிறார். இந்தப் பாடலின் காணொளியும் வெளியிடப்பட்டிருக்கிறது. துள்ளல் இசையுடன் வடிவேலுவின் வசீகரமான குரலும் இணைந்திருப்பதால் இசை ஆர்வலர்களிடத்தில் பெரும் வரவேற்பை பெற்றிருக்கிறது. இந்தப் பாடல் வெளியான குறுகிய கால அவகாசத்திற்குள் நான்கு மில்லியனுக்கும் மேற்பட்ட பார்வையாளர்களால் பார்வையிடப்பட்டு சாதனை படைத்து வருகிறது.

'வடிவேலு ரிட்டன்ஸ்' என குறிப்பிடும் வகையில் இந்த பாடலில் அவருடைய அலப்பறை அமைந்திருப்பதாலும், இதற்கு 'நடனப்புயல்' பிரபுதேவா நடனம் அமைத்திருப்பதாலும், இணையவாசிகளிடமும் பெரும் ஆதரவு கிடைத்து வருகிறது.