தவறவிடாதீர்கள்..!உடனே பதிவு செய்யுங்கள்

இலங்கைக்கான ஜப்பான் தூதுவர் மிசுகோஷி ஹிடேகி உள்ளிட்ட குழுவினர்  நேற்று (நவ 2) மலையகத்துக்கு விஜயம் செய்து, இலங்கை தொழிலாளர் காங்கிரஸுடன் சந்திப்பினை மேற்கொண்டார். 

இ.தொ.கா. விடுத்த அழைப்பின் பேரில் தூதுவர், முதலில் கொட்டகலையில் உள்ள காங்கிரஸ் தொழிலாளர் ஸ்தாபனத்துக்கு வருகை தந்து, அங்கு இ.தொ.காவின் உறுப்பினர்களுடன் கலந்துரையாடினார். 

இதன்போது மலையக இளைஞர், யுவதிகளுக்கு வேலைவாய்ப்பு வழங்குவது தொடர்பில் பேசப்பட்டது. 

அதன் பிறகு ஹட்டனில் உள்ள தொண்டமான் தொழிற்பயிற்சி நிலையத்துக்கு சென்ற தூதுவர், அங்கு இடம்பெறும் பயிற்சிநெறிகளையும், இந்திய அரசாங்கத்தின் நிதியுதவியில் கட்டி முடிக்கப்பட்ட நவீன கட்டடத் தொகுதியையும் பார்வையிட்டுள்ளார். 

இந்நிலையில் குறித்த தொழில்பயிற்சி நிலையத்தில் அறிமுகப்படுத்தப்பட்டுள்ள ஜப்பானிய மொழி கற்கைநெறிகளை விருத்தி செய்வது தொடர்பாகவும், அங்கு பயிற்சி பெற்ற இளைஞர், யுவதிகளுக்கு ஜப்பானில் தொழில்வாய்ப்புகளை பெற்றுக்கொடுக்க நடவடிக்கை எடுக்கப்படுவது தொடர்பிலும், புலமை சார்ந்த தொழில்துறையை அபிவிருத்தி செய்வது தொடர்பாகவும் ஜப்பான் தூதுவர் மிசுகோஷி ஹிடேகி உள்ளிட்ட குழுவினர் இலங்கை தொழிலாளர் காங்கிரஸின் பிரதிநிதிகளோடு கலந்துரையாடினார்.

மேலும், அமரர் சௌமியமூர்த்தி தொண்டமான் காலம் முதல் இன்று வரை இலங்கை தொழிலாளர் காங்கிரஸுக்கும் ஜப்பானுக்கும் இடையிலான நட்புறவு, இ.தொ.கா ஆற்றிவரும் சேவைகள் குறித்தும் ஜப்பான் தூதுவர் பாராட்டியுள்ளார்.

இச்சந்திப்பில் இ.தொ.கா பொதுச் செயலாளரும் நுவரெலியா மாவட்ட பாராளுமன்ற உறுப்பினருமான ஜீவன் தொண்டமான், இலங்கை தொழிலாளர் காங்கிரஸின் தலைவர் செந்தில் தொண்டமான், இ.தொ.கா தவிசாளரும்  நுவரெலியா மாவட்ட பாராளுமன்ற உறுப்பினருமான மருதபாண்டி ராமேஸ்வரன் மற்றும் கட்சியின் பிரதிநிதிகள், பிரதேச சபை  தலைவர்கள், உறுப்பினர்கள் ஆகியோர் கலந்துகொண்டமை குறிப்பிடத்தக்கது.