தவறவிடாதீர்கள்..!உடனே பதிவு செய்யுங்கள்

தீபாவளி திருநாளை முன்னிட்டு ஒக்டோபர் 21ஆம் திகதியன்று வெளியாகும் சிவகார்த்திகேயனின் 'பிரின்ஸ்' திரைப்படம், நகைச்சுவைப் படங்களில் புதிய பாணியை உருவாக்கும் என படக்குழுவினர் நம்பிக்கை தெரிவிக்கின்றனர்.

தெலுங்கு இயக்குநர் அனுதீப் இயக்கி, தீபாவளி விருந்தாக வெளியாகவுள்ள படம் 'பிரின்ஸ்'. இதில் சிவகார்த்திகேயன் கதாநாயகனாக நடிக்க, அவருக்கு ஜோடியாக உக்ரேனிய நாட்டு நடிகை மரியா ரியாபோஷப்கா நடித்திருக்கிறார். இவர்களுடன் சத்யராஜ், பிரேம்ஜி அமரன், 'பிராங் ஸ்டார்' ராகுல், 'ஃபைனலி' பாரத் உள்ளிட்ட பலர் நடித்திருக்கிறார்கள். 

தீபாவளிக்கு வெளியாகும் இந்த படத்தினை ரசிகர்களிடத்தில் அறிமுகப்படுத்தும் வகையில் சென்னையில் பத்திரிகையாளர் சந்திப்பு நடைபெற்றது.

இதன்போது பேசிய சிவகார்த்திகேயன், ''பிரின்ஸ் திரைப்படம் ஒரு எளிமையான கதை. இந்திய பையன் ஒருவன், பிரிட்டிஷ் பெண்ணை காதலிக்கிறான்.

ஆனால், இந்த கதைக்குள் இயக்குநர் நிகழ்த்தியிருக்கும் நகைச்சுவை கலந்த மாயாஜால விடயங்கள் தான் புதிது. நகைச்சுவையைப் பொருத்தவரை ஒருவர் பேச்சுக்கு மறுபேச்சு பேசுவது ஒரு பாணி என்றால், இந்தப் படத்தில் ஒருவர் பேசும்போது அதற்கு சம்பந்தமே இல்லாத வேறொரு பதிலை சொல்வார்கள்.

கதையை அற்புதமாக நகர்த்திச் செல்லும் இந்த படம் மிகவும் ஜாலியான திரைப்படம். அதனால் ரசிகர்கள் அனைவருக்கும் பிடிக்கும்'' என்றார்.

சிவகார்த்திகேயன் நடிப்பில் வெளியாகும் படங்கள் அனைத்தும் பொழுதுபோக்கு அம்சங்களுடன் இருக்கும். ஆனால், இந்த 'பிரின்ஸ்' படம், நாம் எதிர்பாக்காத வகையில் வேறு வகையினதான கொமடி படமாக தயாராகி இருக்கிறது. 

'பாஸ் என்கிற பாஸ்கரன்', 'வருத்தப்படாத வாலிபர் சங்கம்' என நகைச்சுவைக்காக தனி முத்திரை பதித்த படங்களின் வரிசையில் 'பிரின்ஸ்' திரைப்படமும் புதிய ட்ரெண்டை ஏற்படுத்தும் படைப்பாக இருக்கும் என படக்குழுவினர் தெரிவித்திருக்கிறார்கள்.

இந்தப் படம், தமிழில் மட்டுமல்லாமல் தெலுங்கிலும் வெளியாகிறது. ஏறத்தாழ 1000 திரைகளில் திரையிடப்படுகிறது என திரையுலக வணிகர்கள் தெரிவித்திருக்கிறார்கள்.