தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

மெல்பர்ன் ஜீலோங் கார்டினியா பார்க் விளையாட்டரங்கில் இன்று ஞாயிற்றுக்கிழமை (16) நடைபெற்ற 8ஆவது ஐசிசி இருபது 20 உலகக் கிண்ண அத்தியாயத்தின் ஆரம்பப் போட்டியில் ஆசிய சம்பியனும் முன்னாள் உலக சம்பியனுமான இலங்கையை 55 ஓட்டங்களால் நமிபியா அபார வெற்றியீடடி வரலாறு படைத்தது.

இந்த வெற்றி மூலம் மிகவும் கடுமையான முதலாவது தடையை நமிபியா இலகுவாக கடந்து இருபது 20 உலகக் கிண்ணத்தில் தனது நம்பிக்கையை அதிகரித்துக்கொண்டது.

அதேவேளை, ஆசிய கிண்ண கிரிக்கெட் போட்டியில் இந்தியா, பாகிஸ்தான் (2 தடவைகள்) ஆகிய அணிகளை மண்டியிடச் செய்த இலங்கைக்கு    இன்றைய தோல்வியினால் எஞ்சிய 2 முதல் சுற்று போட்டிகளில் பெரும் அழுத்தத்தையும் நெருக்கடியையும் எதிர்கொள்ளவேண்டி ஏற்பட்டுள்து.

இருபது உலகக் கிண்ண முதலாம் சுற்றில் (தகுதிகாண்) இலங்கையும் நமிபியாவும் ஏ குழுவில் இடம்பெறுகின்றன.

இந்தப் போட்டியில் சகலதுறைகளிலும் இலங்கையை விஞ்சும் வகையில் நமிபியா விளையாடி முழு கிரிக்கெட் உலகையும் பிரமிப்பில் ஆழ்த்தியது.

நமிபியாவினால் நிர்ணயிக்கப்பட்ட 164 ஓட்டங்கள் என்ற ஓரளவு கடினமான வெற்றி இலக்கை நோக்கி பதிலுக்கு துடுப்பெடுத்தாடிய இலங்கை 19 ஓவர்களில் சகல விக்கெட்களையும் இழந்து 108 ஓட்டங்களைப் பெற்று மிக மோசமான தோல்வியைத் தழுவியது.

ஓவருக்கு 8.2 ஓட்டங்கள் வீதம் பெறவேண்டிய இக்கட்டான நிலையில் துடுப்பெடுத்தாடிய இலங்கை, சீரான இடைவெளியில் முதல் 3 விக்கெட்களை இழந்து தடுமாற்றத்திற்குள்ளானது.

முன்வரிசை வீரர்களான குசல் மெண்டிஸ் (6), பெத்தும் நிஸ்ஸன்க (6), தனுஷ்க குணதிலக்க (0) ஆகிய மூவரும் ஆட்டமிழக்க 3.3 ஓவர்களில் இலங்கையின் மொத்த எண்ணிக்கை வெறும் 21 ஓட்டங்களாக இருந்தது.

மொத்த எண்ணிக்கை 40 ஓட்டங்களாக இருந்தபோது தனஞ்சய டி சில்வா 12 ஓட்டங்களுடன் களம் விட்டகல இலங்கை மேலும் அழுத்தத்திற்குள்ளானது.

எனினும் பானுக்க ராஜபக்ஷவும் அணித் தலைவர் தசுன் ஷானக்கவும் திறமையாகத் துடுப்பெடுத்தாடி  5ஆவது விக்கெட்டில் 34 ஓட்டங்களைப் பகிர்ந்து மொத்த எண்ணிக்கையை 80 ஓட்டங்களாக உயர்த்தினர். அவர்கள் இருவரும் பகிர்ந்த 34 ஓட்டங்களே இலங்கை அணியின் அதிசிறந்த இணைப்பாட்டமாக அமைந்தது.

ஆனால், இலங்கை அணியின் கடைசி 6 விக்கெட்கள் 36 பந்துகளில் வெறும் 28 ஓட்டங்களுக்கு சரிய நமிபியா வரலாற்று வெற்றியை ஈட்டியது.

பானுக்க ராஜபக்ஷ (20), வனிந்து ஹசரங்க டி சில்வா (4), தசுன் ஷானக்க (29), ப்ரமோத் மதுஷான் (0), சாமிக்க கருணாரட்ன (5), துஷ்மன்த சமீர (8) ஆகியோரே 28 ஓட்டங்கள் வித்தியாசத்தில் ஆட்டமிழந்தவர்களாவர்.

மஹீஷ் தீக்ஷன 11 ஓட்டங்களுடன் ஆட்டமிழக்காதிருந்தார்.

நமிபியா பந்துவீச்சில் டேவிட் வைஸ் 16 ஓட்டங்களுக்கு 2 விக்கெட்களையும் பேர்னார்ட் ஷோல்ட்ஸ் 18 ஓட்டங்களுக்கு 2 விக்கெட்களையும் பென் ஷிக்கொங்கோ 22 ஒட்டங்களுக்கு 2 விக்கெட்களையும் ஜான் ஃப்ரைலின்க் 26 ஓட்டங்களுக்கு 2 விக்கெட்களையும் கைப்பற்றினர்.

முன்னதாக முதலில் துடுப்பெடுத்தாட அழைக்கப்பட்ட நமிபியா 20 ஓவர்களில் 7 விக்கெட்களை இழந்து 163 ஓட்டங்களைக் குவித்தது.

ஐசிசியில் முழு அந்தஸ்துடைய டெஸ்ட் விளையாடும் நாடொன்றுக்கு எதிராக சர்வதேச இருபது 20 கிரிக்கெட் போட்டியில் நமிபியா பெற்ற அதிகூடிய மொத்த எண்ணிக்கை இதுவாகும்.

இதற்கு முன்னர் ஸிம்பாப்வேக்கு எதிராக புலாவாயோவில் கடந்த மே மாதம் பெறப்பட்ட 161 ஓட்டங்களே டெஸ்ட் அணிக்கு எதிராக நமிபியாவினால் சர்வதேச இருபது 20 கிரிக்கெட் போட்டியில் பெறப்பட்ட அதிகூடிய மொத்த எண்ணிக்கையாக இருந்தது.

ஒரு கட்டத்தில் 15ஆவது ஓவரில் 6 விக்கெட்களை இழந்து 93 ஓட்டங்களைப் பெற்றிருந்த நமிபியா, 7ஆவது விக்கெட்டில் ஜோடி சேர்ந்த ஜான் ஃப்றைலின்க், ஜொஹானெஸ் ஸ்மித் ஆகிய இருவரினது நிதானம் கலந்த வேகத்துடனான துடுப்பாட்டங்களின் மூலம் பலமான நிலையை அடைந்தது.

ஐக்கிய அரபு இராச்சியம் மற்றும் ஓமானில் கடந்த வருடம் நடைபெற்ற இலங்கைக்கு எதிரான இருபது 20 உலகக் கிண்ண முதலாம் சுற்றில் நமிபியா 19.3 ஓவர்களில் சகல விக்கெட்களையும் இழந்து 96 ஓட்டங்களை மாத்திரமே பெற்றது.

எனினும் இந்த வருடம் மிகுந்த நம்பிக்கையுடனும் திறமையாகவும் துடுப்பெடுத்தாடிய நமிபியா, 163 ஓட்டங்களைக் குவித்து இலங்கைக்கு கடும் சவாலாக திகழ்ந்தது.

ஆரம்ப வீரர்களான மைக்கல் வென் லிஞ்சென் (3), டிவான் லா குக் (9) ஆகிய இருவரும் முதல் 3 ஓவர்களில் ஆட்டமிழக்க நமிபியாவின் மொத்த எண்ணிக்கை 16 ஓட்டங்களாக இருந்தது.

அதன் பின்னர் திறமையாக துடுப்பெடுத்தாடிக்கொண்டிருந்த ஜான் நிக்ல் லொவ்டி ஈட்டன் 12 பந்துகளில் 20 ஓட்டங்களைப் பெற்றிருந்தபோது ஆட்டமிழந்தார். (35-3 விக்.)

எனினும் ஸ்டெபான் பார்ட் (26), அணித் தலைவர் ஜேர்ஹார்ட் இரேஸ்முஸ் (20) ஆகிய இருவரும் 4ஆவது விக்கெட்டில் 41 ஓட்டங்களைப் பகிர்ந்து அணியை நல்ல நிலைக்கு நகர்த்தினர்.

அவர்கள் இருவரும் 15 ஓட்டங்கள் வித்தியாசத்தில் ஆட்டமிழந்ததுடன் (91-5 விக்.), டேவிட் வைஸ் ஓட்டம் பெறாமல் வெளியேறினார். (14.2 ஓவர்களில் 93 - 6 விக்.)

ஆனால், ஜான் ஃப்றைலின்க், ஜொஹானெஸ் ஸ்மித் ஆகிய இருவரும் அபாரமாகத் துடுப்பெடுத்தாடி 7ஆவது விக்கெட்டில் 34 பந்துகளில் 70 ஓட்டங்களைப் பகிர்ந்து நமிபியாவின் மொத்த எண்ணிக்கையை 163 ஓட்டங்களாக உயர்த்தினர்.

ஜான் ஃப்றைலின்க் 28 பந்துகளில் 4 பவுண்டறிகளின் 44 ஓட்டங்களையும் ஜொஹான் ஸ்மித் 16 பந்துகளில் 2 சிக்ஸ்கள், 2 பவுண்டறிகளுடன் ஆட்டமிழக்காமல் 31 ஓட்டங்களையும் பெற்றனர்.

இலங்கை பந்துவீச்சில் ப்ரமோத் மதுஷான் 37 ஓட்டங்களுக்கு 2 விக்கெட்களையும் மஹேஷ் தீக்ஷன, அணிக்கு மீள்வருகை தந்த துஷ்மன்த   சமீர, சாமிக்க கருணாரட்ன, வனிந்து ஹசரங்க டி சில்வா ஆகியோர் தலா ஒரு விக்கெட்டையும் கைப்பற்றினர்.

ஏ குழுவில் இடம்பெறும் மற்றைய இரண்டு அணிகளான ஐக்கிய அரபு இராச்சியமும் நெதர்லாந்தும் 2ஆவது போட்டியில் விளையாடுகின்றன.