தவறவிடாதீர்கள்..!உடனே பதிவு செய்யுங்கள்

(இராஜதுரை ஹஷான்)

பொருளாதார நெருக்கடிக்கு தீர்வுகாண சர்வதேசத்தின் ஒத்துழைப்பை பெற்றுக்கொள்ள வேண்டுமாயின் சர்வக்கட்சி அரசாங்கத்தை ஸ்தாபிக்க வேண்டும். 

அமைச்சரவையின் எண்ணிக்கையை வரையறுத்து, இராஜாங்க அமைச்சுக்களை நியமிக்காமல் சர்வக்கட்சி அரசாங்கத்தை ஸ்தாபிக்க முழுமையான ஒத்துழைப்பை வழங்குவோம் என பாராளுமன்ற உறுப்பினர் பேராசிரியர் நாலக கொடஹேவா தெரிவித்தார்.

சர்வக்கட்சி அரசாங்கம் தொடர்பில் வினவிய போது மேற்கண்டவாறு குறிப்பிட்டார்.

அரசியல் மற்றும் பொருளாதார நெருக்கடிக்கு தீர்வு காண வேண்டுமாயின் பாராளுமன்றில் அங்கம் வகிக்கும் சகல அரசியல் கட்சிகளையும் ஒன்றிணைத்து இடைக்கால நிர்வாகத்திற்கு சர்வக்கட்சி அரசாங்கத்தை ஸ்தாபிக்குமாறு பல்வேறு தரப்பினர் தொடர்ந்து வலியுறுத்தியுள்ளனர்.

பொருளாதார நெருக்கடிக்கு தீர்வு காண சர்வதேசத்தின் ஒத்துழைப்பை பெற்றுக்கொள்ள வேண்டுமாயின் சர்வக்கட்சி அரசாங்கத்தை ஸ்தாபிக்க வேண்டும்.

சர்வக்கட்சி அரசாங்கம் தொடர்பில் ஸ்ரீ லங்கா பொதுஜன பெரமுனவை தவிர்த்து ஏனைய அரசியல் கட்சிகளின் நிலைப்பாடு பெரும்பாலும் ஒருமித்த நிலையில் காணப்படுகிறது.

அமைச்சரவை அமைச்சுக்களின் எண்ணிக்கையை வரையறுத்து,இராஜாங்க அமைச்சுக்களை நியமிக்காமல் குறுகிய கால அடிப்படையில் சிறந்த கொள்கை அடிப்படையில் சர்வக்கட்சி அரசாங்கம் அமைக்கப்படுமாயின் அதற்கு முழுமையான ஆதரவை வழங்குவோம்.

பாராளுமன்றில் பொதுஜன பெரமுனவிற்கு அதிக பெரும்பான்மை பலம் உள்ளது ஆகையால் தமக்கு அதிக அமைச்சுக்களும், இராஜாங்க அமைச்சுக்களும் வழங்கப்பட வேண்டும் என ஸ்ரீ லங்கா பொதுஜன பெரமுன குறிப்பிட்டுள்ளமை முறையற்றது.பொதுஜன பெரமுனவிற்கு பெரும்பான்மை பலம் உள்ளது என்பதற்காக சர்வதேசத்தின் ஒத்துழைப்பை பெற்றுக் கொள்ள முடியாது.

பொதுஜன பெரமன முரன்பாடாக விடயங்களை முன்வைத்துள்ளதால் சர்வக்கட்சி அரசாங்கத்தை ஸ்தாபிப்பது இழுபறி நிலையில் உள்ளது. எதிர்க்கட்சிகளின் நியாயமான கோரிக்கைகளுக்கமைய சர்வக்கட்சி அரசாங்கத்தை விரைவாக ஸ்தாபிக்க வேண்டும் என்பதை ஜனாதிபதியிடம் வலியுறுத்தியுள்ளோம் என்றார்.