தவறவிடாதீர்கள்..!உடனே பதிவு செய்யுங்கள்

'டி பிளாக்', 'தேஜாவு' என இரண்டு படங்களைத் தொடர்ந்து நடிகர் அருள்நிதி நடிப்பில் தயாராகி இருக்கும் புதிய திரைப்படமான 'டைரி' படத்தின் வெளியிட்டு திகதி அதிகாரப்பூர்வமாக அறிவிக்கப்பட்டிருக்கிறது.

அறிமுக இயக்குநர் இன்னாசி பாண்டியன் இயக்கத்தில் தயாராகி இருக்கும் முதல் திரைப்படம் 'டைரி'. இதில் அருள்நிதி கதையின் நாயகனாக நடிக்க அவருக்கு ஜோடியாக நடிகை பவித்ரா நடித்திருக்கிறார்.

இவர்களுடன் ஆடுகளம் கிஷோர், ஜெயபிரகாஷ் உள்ளிட்ட பலர் நடித்திருக்கிறார்கள். அரவிந்த் சிங் ஒளிப்பதிவு செய்திருக்கும் இந்த படத்திற்கு 'அர்ஜுன் ரெட்டி' பட புகழ் ரலன் ஈதன் யோகன் இசையமைத்திருக்கிறார்.

க்ரைம் திரில்லர் ஜேனரில் தயாராகி இருக்கும் இந்த திரைப்படத்தை ஃபைவ் ஸ்டார் கிரியேஷன்ஸ் பட நிறுவனம் சார்பில் தயாரிப்பாளர் எஸ். கதிரேசன் பிரம்மாண்டமான பொருட் செலவில் தயாரித்திருக்கிறார். இந்தத் திரைப்படத்தை தமிழகம் முழுவதும் ரெட் ஜெயண்ட் மூவிஸ் நிறுவனம் வெளியிடுகிறது.

படப்பிடிப்பு பணிகள் நிறைவடைந்து, ஃபர்ஸ்ட் லுக், டீசர் ஆகியவை வெளியாகி, பெரும் வரவேற்பை பெற்றிருக்கும் நிலையில் இப்படத்தின் வெளியிட்டு திகதி அறிவிக்கப்பட்டிருக்கிறது. அந்த வகையில் ஓகஸ்ட் மாதம் 26 ஆம் திகதி 'டைரி' திரைப்படம் பட மாளிகையில் வெளியாகும் என அறிவிக்கப்பட்டிருக்கிறது.

'டி பிளாக்', 'தேஜாவு 'என வரிசையாக ஆங்கில எழுத்து 'D' யில் தொடங்கும் பட தலைப்பில் நடித்து வரும் நடிகர் அருள்நிதி, மீண்டும் 'D' என ஆங்கில எழுத்தில் தொடங்கும் 'டைரி' படத்தில் நடித்திருப்பதால் ரசிகர்கள் இந்த திரைப்படமும் மாபெரும் வெற்றி பெறும் என தெரிவிக்கிறார்கள்.

நடிகர் அருள்நிதி நடிப்பில் தயாராகி நீண்ட நாட்களாக கிடப்பில் இருந்த 'டைரி' திரைப்படத்தை, அவரது சகோதரரும், முன்னணி திரைப்பட வெளியீட்டு நிறுவனமான உதயநிதி ஸ்டாலினின் ரெட் ஜெயண்ட் மூவிஸ் தயவுடன் 'டைரி' திரைப்படம் வெளியாவதால், இதற்கு திரையுலக வணிகர்களிடையே பெரும் ஆதரவு கிடைத்து வருகிறது என்பது குறிப்பிடத்தக்கது.