தவறவிடாதீர்கள்..!உடனே பதிவு செய்யுங்கள்

'விக்ரம்', 'மாமனிதன்' ஆகிய படங்களின் வெற்றிக்குப் பிறகு 'மக்கள் செல்வன்' விஜயசேதுபதி நடிப்பில் தயாராகி இருக்கும் புதிய மலையாள திரைப்படமான ''19 (1)(a)'', டிஸ்னி ஹாட் ஸ்டார் டிஜிட்டல் தளத்தில் வெளியாகும் என அதிகாரப்பூர்வமாக அறிவிக்கப்பட்டிருக்கிறது.

தமிழ் சினிமாவில் மட்டுமல்லாமல் மலையாளம், தெலுங்கு, கன்னடம், ஹிந்தி என இந்திய மொழிகள் அனைத்திலும் ஓய்வில்லாமல் நடித்து, அகில இந்திய முன்னணி திரை நட்சத்திரமாக உயர்ந்திருக்கிறார் 'மக்கள் செல்வன்' விஜயசேதுபதி.‌ வி.எஸ். இந்து எனும் பெண் படைப்பாளி இயக்கத்தில் உருவாகி இருக்கும் திரைப்படம் ''19(a)(1).'' இதில் விஜய சேதுபதி கதையின் நாயகனாகவும், அவருக்கு ஜோடியாக நடிகை நித்யா மேனனும் நடித்திருக்கிறார்கள். இவர்களுடன் மலையாள நடிகர்கள் இந்திரன்ஸ் மற்றும் இந்திரஜித் சுகுமாரன் ஆகியோர் நடித்திருக்கிறார்கள். 

மகேஷ் மாதவன் ஒளிப்பதிவு செய்திருக்கும் இந்த படத்திற்கு கோவிந்த் வசந்தா இசையமைத்திருக்கிறார். கருத்து சுதந்திரத்தை மையப்படுத்தி உருவாகி இருக்கும் இந்த திரைப்படத்தை அன்டோ ஜோசப் ஃபிலிம் கம்பெனி மற்றும் அன் மெகா மீடியா ஆகிய இரண்டு நிறுவனங்கள் இணைந்து தயாரித்திருக்கிறது.

இந்த திரைப்படம் படமாளிகையில் வெளியாகாமல் நேரடியாக டிஸ்னி ஹாட் ஸ்டார் எனும் டிஜிட்டல் தளத்தில் வெளியாகிறது என அதிகாரப்பூர்வமாக அறிவிக்கப்பட்டிருக்கிறது. வெளியீட்டு திகதி விரைவில் அறிவிக்கப்படும் என்றும் எதிர்பார்க்கப்படுகிறது. இதனிடையே நடிகர் விஜய் சேதுபதி இதற்கு முன் 'மார்க்கோனி மத்தாய்' எனும் மலையாள படத்தில் நடித்திருக்கிறார் என்பதும், அவர் நடிக்கும் இரண்டாவது மலையாள படம் இது என்பதும் குறிப்பிடதக்கது.