தவறவிடாதீர்கள்..!உடனே பதிவு செய்யுங்கள்

(நெவில் அன்தனி)

இலங்கை பாடசாலைகள் வலைபந்தாட்ட சங்கம் ஏற்பாடு செய்திருந்த மைலோ சுப்பர் 16 பாடசாலை அணிகளுக்கு இடையிலான வலைபந்தாட்ட சுற்றுப் போட்டியில் எதிர்பார்த்தவாறு குருநாகல் திருக்குடும்ப கன்னியாஸ்திரிகள் மடம் பாடசாலை (எச்.எவ்.சி.) அணி சம்பியனானது.

தெரிவு செய்யப்பட்ட 16 பாடசாலைகள் பங்குபற்றிய வலைபந்தாட்ட சுற்றுப் போட்டி பத்தரமுல்லை புத்ததாச மைதானத்தில் 12 ஆம் திகதி ஞாயிற்றுக்கிழமை நடைபெற்றது.

நான்கு குழுக்களில் நடத்தப்பட்ட சுப்பர் 16 பாடசாலைகள் வலைபந்தாட்ட இறுதிப் போட்டியில் கொழும்பு மியூசியஸ் கல்லூரியை 39 - 25 என்ற கோல்கள் வித்தியாசத்தில் வெற்றிகொண்ட குருநாகல் திருக்குடும்ப கன்னியாஸ்திரிகள் மடம் பாடசாலை சம்பியனாகி பாடசாலைகள் வலைபந்தாட்டத்தில் முடிசூடா இராணிகள் என்பதை மீண்டும் நிரூபித்தது.

மைலோ கிண்ண பாடசாலைகள் வலைந்தாட்டத்தில் 2008ஆம் ஆண்டிலிருந்து 2019வரை தொடர்ச்சியாக 12 வருடங்கள் குருநாகல் திருக்குடும்ப கன்னியாஸ்திரிகள் மடம் பாடசாலை ஒட்டுமொத்த சம்பியனாகியிருந்தது குறிப்பிடத்தக்கது.

கோத்தமி மகளிர் வித்தியாலயத்தை கால் இறுதியில் 18 - 11 என்ற கொல்கள் கணக்கில் வெற்றகொண்ட குருநாகல் திருக்குடும்ப கன்னியாஸ்திரிகள் மடம் பாடசாலை, அரை இறுதியில் கடும் சவாலுக்கு மத்தியில் 8 - 2 என களுத்துறை மகளிர் வித்தியாலயத்தை வெற்றிகொண்டிருந்தது.

கால் இறுதியில் கண்டி ஹில்வூட் கல்லூரியை 13 - 7 என்ற கோல்கள் கணக்கிலும் அரை இறுதியில் குருநாகல் மலியதேவ மகளிர் கல்லூரியை 14 - 8 என்ற கோல்கள் கணக்கிலும் மியூசியஸ் கல்லூரி வெற்றிகொண்டிருந்தது.

மூன்றாம் இடத்துக்கான போட்டியில் மலியதேவ மகளிர் கல்லூரியின் கடும் சவாலை முறியடித்து 12 - 11 என வெற்றிபெற்ற களுத்துறை மகளிர் வித்தியாலயம் 3ஆம் இடத்தைப் பெற்றது.

உயிர்த்த ஞாயிறு குண்டுத் தாக்குதல், கொரோனா தொற்று நோய் தாக்கம் ஆகிய காரணங்களால் தடைப்பட்ட பாடசாலைகள் வலைபந்தாட்டம் 3 வருடங்களின் பின்னர் நடைபெற்ற போதிலும் பல வீராங்கனைகளின் ஆற்றல்கள் பாராட்டும் வகையில் அமைந்திருந்தன.

மேலும் வலைபந்தாட்டப் போட்டிகளுக்கு மீளுயிர் கொடுக்கும் வகையில் நெஸ்லே லங்கா லிமிட்டெட் நிறுவனத்தின் மைலோ அனுசரணையுடன் சுப்பர் 16 பாடசாலைகள் வலைபந்தாட்ட சுற்றுப் போட்டி முதல் தடவையாக நடத்தப்பட்டது குறிப்பிட்டுச் சொல்லக்கூடிய விடயமாகும்.

இந்த சுற்றுப் போட்டியில் வலைபந்தாட்ட இராணியாக குருநாகல் திருக்குடும்ப கன்னியாஸ்திரிகள் மடம் பாடசாலை வீராங்கனை ஹிருணி ஹேஷானி தெரிவானார்.

அதிசிறந்த கோல்போடும் வீராங்கனை: பாஷி உடகெதர (எச்.எவ்.சி.)

அதிசிறந்த தடுத்தாடும் வீராங்கனை: நேதங்க குணரட்ன (மியூசியஸ் கல்லூரி)

அதிசிறந்த எதிர்த்தாடும் வீராங்கனை: நட்டாஷா டயஸ் (எச்.எவ்.சி.)