தவறவிடாதீர்கள்..!உடனே பதிவு செய்யுங்கள்

(என்.வீ.ஏ.)

அன்டிகுவா, நோர்த் சவுண்ட் விளையாட்டரங்கில் செவ்வாய்க்கிழமை ஆரம்பமான மேற்கிந்தியத் தீவுகளுடனான முதலாவது டெஸ்ட் கிரிக்கெட் போட்டியில் வீழ்ச்சியை நோக்கி சென்று கொண்டிருந்த இங்கிலாந்தை, 2 இணைப்பாட்டங்கள் மூலம் ஜொனி பெயார்ஸ்டோவ் மீட்டெடுத்தார்.

அப் போட்டியில் முதலில் துடுப்பெடுத்தாடத் தீர்மானித்த இங்கிலாந்து முதலாம் நாள் ஆட்ட நேர முடிவில் 6 விக்கெட்களை இழந்து 268 ஓட்டங்களைப் பெற்றிருந்தது.

அலெக்ஸ் லீஸ் (4), ஸக் க்ரோவ்லி (8), அணித் தலைவர் ஜோ ரூட் (13), டான் லோரன்ஸ் (20) ஆகிய நால்வரும் ஆட்டமிழக்க இங்கிலாந்தின் மொத்த எண்ணிக்கை வெறும் 48 ஓட்டங்களாக இருந்தது.

இத்தகைய இக்கட்டான நிலையில் பென் ஸ்டோக்ஸ் (36), ஜொனி பெயார்ஸ்டோவ்   ஆகிய இருவரும் ஜோடி சேர்ந்து 5 ஆவது விக்கெட்டில் 67 ஓட்டங்களைப் பகிர்ந்து இங்கிலாந்துக்கு ஓரளவு நம்பிக்கை கொடுத்தனர்.

தொடர்ந்து பெயார்ஸ்டோவ்வும் பென் ஃபோக்ஸும் பொறுமையுடன் துடுப்பெடுத்தாடி 6ஆவது விக்கெட்டில் 99 ஓட்டங்களைப் பகிர்ந்திருந்தபோது ஃபோக்ஸ் 42 ஓட்டங்களுடன் ஆட்டமிழந்தார்.

மிகவும் திறமையாகத் துடுப்பெடுத்தாடிய பெயார்ஸ்டோவ் ஆட்டநேர முடிவில் ஆட்டமிழக்காமல் 109 ஓட்டங்களைப் பெற்றிருந்தார். 

மறு முனையில் கிறிஸ் வோக்ஸ் 24 ஓட்டங்களுடன் ஆட்டமிழக்காதிருந்தார்.

மேற்கிந்தியத் தீவுகள் பந்துவீச்சில் ஜேசன் ஹோல்டர் 15 ஓட்டங்களுக்கு 2 விக்கெட்களையும் ஜேடன் சீல்ஸ் 54 ஓட்டங்களுக்கு 2 விக்கெட்களையும் கெமர் ரோச் 71 ஓட்டங்களுக்கு 2 விக்கெட்களையும் கைப்பற்றினர்.