தவறவிடாதீர்கள்..!உடனே பதிவு செய்யுங்கள்

( எம்.எப்.எம்.பஸீர்)

பொலிஸ் ஊடகப் பேச்சாளர் பதவியில் விரைவில் மாற்றம் ஏற்படுத்துவது தொடர்பில் அவதானம் செலுத்தப்பட்டுள்ளது.

தற்போதைய பொலிஸ் ஊடகப் பேச்சாளர் சிரேஷ்ட பொலிஸ் அத்தியட்சர் நிஹால் தல்துவ,   ஊடகங்களை கையாள்வதில்  சற்று பின்னடைவை எதிர்நோக்கியுள்ள நிலையிலும், அண்மையில் அவர் வெளியிட்ட சில கருத்துக்கள் சமூகத்தில் பலத்த விமர்சனங்களுக்கு உள்ளான நிலையிலும்  இந்த தீர்மானம் எடுக்கப்பட்டுள்ளதாக அறிய முடிகிறது.

இந் நிலையில்,  பொலிஸ் பேச்சாளர் பதவியை தற்போது குற்றம் மற்றும் போக்குய்வரத்து பிரிவின் பிரதானியாக பணியாற்றும் சிரேஷ்ட பிரதிப் பொலிஸ் மா அதிபர் அஜித் ரோஹணவுக்கு  மேலதிக பதவியாக கையளிப்பது தொடர்பில் ஆராயப்பட்டுள்ளது.  

பொலிஸ் பேச்சாளர் பதவியில் ஐந்துமுறை கடமையாற்றிய அனுபவம் வாய்ந்த அதிகாரி எனும் ரீதியில் இந்த அவதானம் திரும்பியுள்ளதாக தகவல்கள் தெரிவித்தன. 

எவ்வாறாயினும் குற்றம் மற்றும் போக்குவரத்து பிரிவின் வேலைப் பளுவுக்கு மத்தியில் அவரிடம் மற்றொரு சுமையை சுமத்துவதைவிட, அஜித் ரோஹணவின் நேரடி கட்டுப்பாட்டில் புதியதொரு பொலிஸ் பேச்சாளரை அறிமுகம் செய்வது தொடர்பிலும் பொலிஸ் தலைமையகத்தின் அவதானம் திரும்பியுள்ளது.

 பொலிஸாருக்கும் ஊடகங்களுக்கும் இடையிலான தொர்புகளை வலுப்படுத்தும் நோக்கில்  உரிய ஒருவரை அப்பதவிக்கு நியமிக்க வேண்டும் என பொலிஸ் மா அதிபர் சந்தன விக்ரமரத்னவும்  தீர்மானித்துள்ள நிலையில் அது குறித்து நடவடிக்கைகள் தற்போதும் இடம்பெற்று வருவதாக பொலிஸ் தலைமையக தகவல்கள் தெரிவித்தன.