தவறவிடாதீர்கள்..!உடனே பதிவு செய்யுங்கள்

(எம்.எம்.சில்வெஸ்டர்)

ஓமானில் நேற்று ஆரம்பமான லெஜெண்ட்ஸ் லீக் கிரிக்கெட் போட்டியில்  பெண் நடுவர்கள் இருவர் கள நடுவர்களாக செயற்பட்டிருந்தமை விசேட அம்சமாகும். இப்போட்டியில் உமைரா பராஹ் என்ற பாகிஸ்தானியரும், ஷுப்தா போசலே என்ற இந்தியரும் ஒன்றாக பணியாற்றியமை பலரது கவனத்தையும் ஈர்த்தது.

உமைரா பராஹ் என்பவரே பாகிஸ்தானின்  முதலாவது பெண் கிரிக்கெட் நடுவராவார். பாடசாலை ‍ஹொக்கி அணியில் இடம்பிடித்திருந்த உமைரா,  பாடசாலைகளுக்கிடையிலான ஹொக்கி போட்டித் தொடரில் சிறந்த ஹொக்கி வீராங்கனையாக தெரிவானார். 

இதன் பின்னர் பாகிஸ்தான் ரெயில்வே ஹொக்கி அணி சார்பாகவும் விளையாடி வந்தார். பின்னர், விளையாட்டுத் துறை  நிர்வாகம் சம்பந்தமான கற்கை நெறிகளை கற்றுத் தேர்ந்ததுடன், கிரிக்கெட் நடுவருக்கான  பரீட்சைகளிலும் சித்தியடைந்து 2005  ஆம் ஆண்டு முதல் சர்வதேச கிரிக்கெட் நடுவராக பணியாற்றி வருகிறார். 

இவர் இதுவரை 170 க்கும் அதிகமான போட்டிகளுக்கு நடுவராக பணியாற்றியுள்ளமை விசேட அம்சமாகும்.

நடுவராக பணியாற்றுவது என்பது மிகுந்த சவாலான வேலையாகும். இந்நிலையில், கணவனை இழந்து வாடும் உமைரா பராஹ் தனிப்பட்ட வாழ்க்கையும் மிகுந்த சவால் மிக்கதாகவே விளங்குகிறது.

இதேவேளை, இப்போட்டியில் மற்றுமொரு களநடுவராக பணியாற்றி ஷுப்தா போசலே இந்தியாவின் மிக இளவயதில் கிரிக்கெட் நடுவராக நியமனம் பெற்ற பெண் நடுவராக விளங்குகிறார். 

2011 ஆம் ஆண்டு  கிரிக்கெட் நடுவருக்கான பரீட்சையில் சித்தியடைந்ததன் மூலமான தனது 21 ஆவது வயதில் இந்தியாவின் மிக இள வயது பெண் கிரிக்கெட் நடுவாரானார். இதற்கு முன்னர், இந்தியாவின் மத்திய பிரதேச  மாநிலத்தின் 16 வயதுக்குட்பட்ட மற்றும் 19 வயதுக்குட்பட்ட மகளிர் கிரிக்கெட் அணி சார்பாக விளையாடியுள்ள இவர், கிரிக்கெட் பின்னணியை கொண்ட குடும்பத்தை சேர்ந்தவராவார்.

ஷுப்தா போசலேவின் தந்தையான அஜித் போசலே கிரிக்கெட் பயிற்றுநர் என்பதுடன், அவரது சிறிய தந்தையான சிறிகாந்த் போசலே ரஞ்சி கிண்ணத் தொடரில் விளையாடி வீரராவார். மேலும், அவரது  சகோதரரும் விதர்பா அணிக்காக விளையாடி வருகிறார். 

சமூகத்தில் பல பெண்கள் திருமணத்திற்கு பின்னர் தமது தொழில் துறைகளிலிருந்து விலகிவிடுகின்றனர். எனினும், எனது கணவரான  சுஜய் எனது நடுவர் பணியை தொடர்ந்தும் ஈடுபடுவதற்கு பெரும் உந்து சக்தியாக இருக்கிறார் என ஷுப்தா  போசலே கூறியுள்ளார்.

ஷுப்தா போசலே, இதுவரை 75 அதிகமான கிரிக்கெட் போடிகளுக்கு  நடுவராக பணியாற்றியுள்ளமை குறிப்பிடத்தக்கது.