இலங்கை கடற்படையினரால் தெற்கு கடற்பரப்பில் நேற்று நடத்தப்பட்ட சிறப்பு கண்காணிப்பு நடவடிக்கையில் கடல் வழியாக நாட்டுக்குள் கடத்த முயன்ற சுமார் 290.200 கிலோ கிராம் ஹெரோயின் கைப்பற்றப்பட்டுள்ளது.

இதன்போது 05 சந்தேக நபர்கள் கைதுசெய்யப்பட்டுள்ளதுடன், கடத்தல் முயற்சிக்கு பயன்படுத்தப்பட்ட படகொன்றையும் கடற்படையினர் கைப்பற்றியுள்ளனர். 

இதேவேளை ஹெரோயின் மற்றும் சந்தேக நபர்களுடன் மீன்பிடி படகு இன்று அதிகாலை கரைக்கு கொண்டு வரப்பட்டது.

இலங்கை கடற்படை புலனாய்வு மற்றும் பிற புலனாய்வு சேவைகள் தலைமையிலான ஒருங்கிணைந்த புலனாய்வு நடவடிக்கையின் மூலம் பெறப்பட்ட தகவலின் அடிப்படையில், கடற்படை கடற்பரப்பில் சந்தேகத்திற்கிடமான பல நாள் மீன்பிடி விசைப்படகை கண்டுபிடித்து சோதனையிட்டுள்ளனர்.

ஆகஸ்ட் 30 பிற்பகல் படகில் மறைத்து வைக்கப்பட்டிருந்த 10 சாக்குகளில் அடைக்கப்பட்ட 259 பொதிகளில் சுமார் 290.200 கிலோ கிராம் ஹெராயினை மீட்டுள்ளனர்.

இவற்றின் பெறுமதி 2.32 பில்லியன் ரூபாவுக்கும் அதிகம் என்று மதிப்பிடப்பட்டுள்ளது.

கொவிட்-19 தொற்றுநோய் பரவுவதைத் தடுக்கும் நெறிமுறைகளைப் பின்பற்றி இந்த விசேட நடவடிக்கை மேற்கொள்ளப்பட்டது. 

இந்த நடவடிக்கையின் போது கைது செய்யப்பட்ட சந்தேக நபர்கள் அஹுங்கல்ல, பலபிட்டிய மற்றும் ஹபரதுவ ஆகிய பகுதிகளில் வசிக்கும் 31 முதல் 37 வயதுடையவர்கள் என அடையாளம் காணப்பட்டுள்ளனர்.

இதற்கிடையில் கடற்படை மற்றும் பொலிஸ் போதைப்பொருள் தடுப்பு பணியகம் இந்த சம்பவம் தொடர்பான மேலதிக விசாரணைகளை மேற்கொண்டு வருகின்றன.