(எம்.மனோசித்ரா)
அதிபர் - ஆசிரியர்கள் தமது உரிமைகளை வென்றெடுப்பதற்காகவும், பல்கலைக்கழக மாணவர்கள் சுதந்திர கல்வியை பாதுகாப்பதற்காகவும் முன்னெடுக்கும் ஆர்ப்பாட்டங்களை அடக்குமுறை ஊடாக முடக்குவதற்கு அரசாங்கம் முயற்சிக்கிறது. சிவில் உடையில் பொலிஸாரை அனுப்பி மாணவர்களை கைது செய்யும் வெள்ளை வேன் கலாசாரத்தை மீண்டும் ஆரம்பித்து செப்டெம்பரில் பாரதூரமான ஜெனிவா நெருக்கடிக்கு முகங்கொடுக்க தயாராக வேண்டாம் என்று அரசாங்கத்தை எச்சரிப்பதாக பாராளுமன்ற உறுப்பினர் சம்பிக்க ரணவக்க தெரிவித்தார்.

அவர் மேலும் கூறுகையில், அரசாங்கத்தின் தொடர்ச்சியான அடக்குமுறைகள் எதிர்காலத்தில் அதற்கு எதிராகவே அமையும். ஜே.ஆர்.ஜயவர்த்தனவினுடைய ஆட்சியில் இதே போன்று அவருக்கு எதிராக பாரிய மாணவர் போராட்டம் முன்னெடுக்கப்பட்டது. மாணவர்களை விடுவிக்குமாறு வலியுறுத்தியும், வடகொழும்பு மருத்துவ வித்தியாலயத்தை நீக்குமாறும் வலியுறுத்தியும் அந்த ஆர்ப்பாட்டம் முன்னெடுக்கப்பட்டது.

இதன் மூலம் தேசிய மற்றும் சர்வதேச  மனித உரிமைகள் அமைப்புக்களின் அழுத்தங்கள் மேலும் அதிகரிக்கும். எனவே கைது செய்யப்பட்ட மாணவர்கள், ஆசிரியர்கள் சகலருக்கு எதிரான வழக்குகளையும் இரத்து செய்யுமாறு அரசாங்கத்தை வலியுறுத்துகின்றோம் என்றார்.