தவறவிடாதீர்கள்..!உடனே பதிவு செய்யுங்கள்

செல்லப் பிராணியான நாய் கதையின் நாயகனாக நடித்திருக்கும் 'அன்புள்ள கில்லி' படத்திற்கு பிரபல நகைச்சுவை நடிகர் சூரி பின்னணி குரல் கொடுத்திருக்கிறார். இதன் முன்னோட்டம் அண்மையில் வெளியானது. இதனை நடிகர் சூரி மற்றும் நடிகை ஐஸ்வர்யா ராஜேஷ் ஆகியோர் தங்களது இணையப்பக்கத்தில் வெளியிட்டனர்.

'உனக்கென்ன வேணும் சொல்லு' என்ற படத்தை இயக்கிய இயக்குனர் ராமலிங்கம் இயக்கத்தில் தயாராகி இருக்கும் புதிய திரைப்படம் 'அன்புள்ள கில்லி'. இந்தப்படத்தில் நடிகர் மைத்ரேய ராஜசேகர், நடிகைகள் துஷாரா விஜயன், சாந்தினி தமிழரசன், மைம் கோபி, விஜே ஆஷிக், நாஞ்சில் விஜயன், இளவரசு, 'பூ' ராமு, இந்துமதி, ஸ்ரீரஞ்சனி மற்றும் பேபி கிருத்திகா உள்ளிட்ட பலர் நடித்திருக்கிறார்கள். அத்துடன் இந்த படத்தில் பலரது இல்லங்களில் செல்லப்பிராணியாக வளர்க்கப்படும் லாப்ரடர் இன நாய் ஒன்றும் நடித்திருக்கிறது. பாலசுப்ரமணியம் ஒளிப்பதிவு செய்திருக்கும் இந்த படத்திற்கு, ஆரோல் கொரோலீ இசையமைத்திருக்கிறார்.

இப்படத்தில் நடித்திருக்கும் செல்ல பிராணியான நாய் ஒன்றிற்கு நடிகர் சூரி பின்னணி குரல் கொடுத்திருக்கிறார். இது தொடர்பாக அவர் பேசுகையில்' எம்முடைய வாழ்க்கையில் முதன்முறையாக சக ஜீவராசி ஒன்றுக்கு குரல் கொடுத்திருக்கிறேன். இத்தகைய புதிய முயற்சியை மேற்கொண்ட படக்குழுவினருக்கு வாழ்த்து தெரிவிக்கிறேன்.இந்த புதிய முயற்சிக்கு அனைவரும் ஆதரவு தெரிவிக்க வேண்டும்' என்றார்.

முன்னோட்டத்தில் நாயிற்கு சூரியின் குரல் பொருத்தமாக இருப்பதாக ஏராளமான சிறார்கள் லைக்குகளும், கமெண்டுகளும் தெரிவித்து வருவதால்,  'அன்புள்ள கில்லி' முன்னோட்டத்திற்கு எதிர்பாராத வகையில் பெரும் வரவேற்பு கிடைத்து வருகிறது.

இதனிடையே நாயை மையப்படுத்தி ஏற்கனவே 'சார்லி 777' என்ற திரைப்படத்தின் டீசர் வெளியாகி இணையத்தில் சாதனை படைத்திருக்கிறது என்பதும், 'மக்கள் செல்வன்' விஜய் சேதுபதி 'அண்டாவ காணோம்' என்ற படத்தில் அண்டாவிற்கு பின்னணி குரல் கொடுத்திருக்கிறார் என்பதும் குறிப்பிடத்தக்கது.