தவறவிடாதீர்கள்..!உடனே பதிவு செய்யுங்கள்

சட்ட மா அதிபர் திணைக்களத்தின் புதிய கட்டிடத்தில் தமிழ் மொழி புறக்கணிக்கப்பட்ட நினைவு பலகையை நீதி அமைச்சர் அலி சப்ரி உடனடியாக நீக்கியுள்ளார்.

இலங்கை தொழிலாளர் காங்கிரஸின் உப தலைவரும், பிரதமரின் இணைப்புச் செயலாளருமான செந்தில் தொண்டமானின் கோரிக்கைக்கு அமைய, இந்த நடவடிக்கை எடுக்கப்பட்டுள்ளது. 

சட்ட மா அதிபர் திணைக்களத்தில் சீன அரசாங்கத்தின் நிதியுதவியுடன் நிர்மாணிக்கப்பட்ட இலத்திரனியல் நூலகத்தின் கட்டிட திறப்பு விழாவில் அங்குரார்ப்பணம் செய்யப்பட்ட நினைவு பலகையில் தமிழ் மொழி முழுமையாக புறக்கணிக்கப்பட்டு, சீன மொழி உள்வாங்கப்பட்டிருந்தது.

இந்த விடயம் தொடர்பில் செந்தில் தொண்டமான், விடயத்திற்கு பொறுப்பான அமைச்சர் அலி சப்ரியின் கவனத்திற்கு இன்று காலை கொண்டு வந்திருந்தார்.

அதையடுத்து, நீதி அமைச்சர் அலி சப்ரி, சட்ட மா அதிபர் திணைக்களத்திலுள்ள குறித்த நினைவு பலகையை உடனடியாக நீக்கியுள்ளார்.இவ்வாறு குறித்த நினைவு பலகை நீக்கப்பட்டமையை, நீதி அமைச்சர் அலி சப்ரி தொலைபேசி ஊடாக தனக்கு அறிவித்தாக பிரதமரின் இணைப்புச் செயலாளர் செந்தில் தொண்டமான் வீரகேசரி செய்திச் சேவைக்கு தெரிவித்தார்.