இம்முறை இடம்பெறும் 2021 ஆண்டுக்கான ஐ.பி.எல். இருபதுக்கு - 20 தொடரிலிருந்து டெல்லி கெப்பிட்டல்ஸ் அணி வீரரும் இந்திய கிரிக்கெட் அணியின் முன்னணி சுழற்பந்து வீச்சாளருமான அஸ்வின் விலகியுள்ளார்.

கொரோனா வைரஸ் பரவலின்போது குடும்பத்துடன் இருக்கவேண்டிய அவசியம் இருப்பதால் விலகியதாக அஸ்வின் தெரிவித்துள்ளார். 

அதேநேரம், தற்போதைய சூழல் நல்லபடியாக மாறினால், நான் அணிக்குள் மீண்டும் வருவேன் என்றும் அஸ்வின் தெரிவித்துள்ளார். 

இது தொடர்பாக டுவிட்டரில் அஸ்வின் தெரிவித்திருப்பதாவது,

“ 2021 ஐ.பி.எல். தொடரிலிருந்து நாளை முதல் நான் விடைபெற்றுக் கொள்கிறேன். கொரோனா வைரஸுக்கு எதிராக என்னுடைய குடும்பத்தார் போராடி வரும் நிலையில் இந்த நேரத்தில் அவர்களுக்காக இந்த கடினமான நேரத்தில் உடன் இருப்பது அவசியம். அனைத்தும் சரியான திசையில் சென்றால் நான் மீண்டும் அணியில் இணைவேன் என எதிர்பார்க்கிறேன்” எனப் பதிவிட்டுள்ளார். 

இந்நிலையில், இந்த கடினமான தருணத்தில் அஸ்வினுக்கு முழு ஆதரவு அளிப்பதாக டெல்லி கெப்பிட்டல்ஸ் அணி நிர்வாகமும் தனது டுவிட்டரில் பதிவிட்டுள்ளமை குறிப்பிடத்தக்கது.