ஜெனிவா வாக்கு - மாறுபடும் நியாயங்கள்

-சுபத்ரா

"இலங்கையின் இறைமையை பாதுகாக்கவும், இந்தியாவின் நலன்களை உறுதிப்படுத்தவும் வந்திறங்கிய இந்திய படைகள், ஈற்றில் இலங்கையின் இறைமையையும் பாதுகாக்கவில்லை. தனது நாட்டின் நலனையும் உறுதிப்படுத்திக் கொள்ளவில்லை"

ஐ.நா. மனித உரிமைகள் பேரவையில், பிரித்தானியா உள்ளிட்ட அனுசரணை நாடுகளால் முன்வைக்கப்பட்ட தீர்மானத்துக்கு எதிராக - இலங்கைக்கு ஆதரவாக வாக்களித்த 11 நாடுகளில் பங்களாதேஷும் ஒன்று.

பெரும்பாலான இஸ்லாமிய நாடுகள், இலங்கைக்கு எதிராக கொண்டு வரப்பட்ட தீர்மானத்தின்போது, வாக்களிக்காமல் நடுநிலை வகிக்க, பங்களாதேஷ், பாகிஸ்தான், சோமாலியா, உஸ்பெகிஸ்தான் என நான்கு நாடுகள் மட்டும், இலங்கைக்கு ஆதரவு அளித்திருந்தன.

ஏனைய 10 இஸ்லாமிய நாடுகளும் வாக்களிப்பில் பங்கேற்கவில்லை.

நடுநிலை வகித்த இந்தியாவுக்கு வலம் இடமாக உள்ள பாகிஸ்தானும், பங்களாதேஷும், இலங்கையின் பக்கம் நின்று தமது ஆதரவை வெளிப்படுத்தின.

இந்தியாவின் பகை நாடு பாகிஸ்தான். அதுபோல இன்னொரு பகை நாடு சீனா.

இந்த இரண்டும், இலங்கையை ஆதரித்த போது, இந்தியா அதனை மையப்படுத்தி முடிவெடுக்கவில்லை.

அதுபோலவே, பாகிஸ்தானிடமிருந்து – பெரும் அழிவுகளுடன், இந்தியாவின் உதவியுடன் சுதந்திரம் பெற்ற நாடு பங்களாதேஷ்.

பாகிஸ்தான் ஆதரிக்கும் தீர்மானத்தை, தாங்கள் எதிர்க்க வேண்டும் என்று பங்களாதேஷ் நினைக்கவில்லை.

பங்களாதேஷ் சுதந்திரம் பெற்று 50 ஆண்டுகள் நிறைவடைவதை முன்னிட்டு, அண்மையில் ஒரு வார கால கொண்டாட்டங்கள் இடம்பெற்றன.

இந்த பொன்விழா கொண்டாட்டங்களின் தொடக்கத்தில் பிரதமர் மஹிந்த ராஜபக்ஷ பிரதம விருந்தனராக அழைக்கப்பட்டிருந்தார். நிறைவு விழாவில் இந்தியப் பிரதமர் நரேந்திர மோடி பங்கெடுத்திருந்தார்.