(இராஜதுரை ஹஷான்)
தற்கொலை குண்டுதாரி சஹ்ரானின் அடிப்படைவாத கொள்கைக்கு மக்கள் விடுதலை முன்னணியின் ஒரு சில உறுப்பினர்கள் ஈர்க்கப்பட்டுள்ளார்களா  என்ற சந்தேகம் காணப்படுகிறது என  பொதுமக்கள் பாதுகாப்பு அமைச்சர் அட்மிரல் சரத் வீரசேகர தெரிவித்தார்.

மாளிகாகந்த விகாரையில் இடம்பெற்ற மத வழிபாட்டில் கலந்துக் கொண்டதன் பின்னர் ஊடகங்களுக்கு கருத்துரைக்கையில் மேற்கண்டவாறு குறிப்பிட்டார்.

அவர் மேலும் குறிப்பிடுகையில்,

ஏப்ரல் 21குண்டுத்தாக்குதலின் தற்கொலை குண்டுதாரிகளின் தந்தையான இப்ராஹிம்  மக்கள் விடுதலை முன்னணியின்  தேசிய பட்டியல் உறுப்பினராக செயற்பட்டுள்ளார். இவ்விடயம் குறித்து விசாரணைகளில்  வாக்குமூலம் வழங்க நேரிடும் என்பதில் மக்கள் விடுதலை முன்னணியின் தலைவர் அனுரகுமார திஸாநாயக்க அச்சம் கொண்டுள்ளார்.

 முன்னெடுக்கப்பட்ட விசாரணைகளில்  இப்ராஹிம் என்பவர் மக்கள் விடுதலை முன்னணியின் தேசிய பட்டியல்  உறுப்பினராக செயற்பட்டமை உறுதிப்படுத்தப்பட்டுள்ளது. தற்கொலை குண்டுதாரி சஹ்ரானின் கொள்கைக்கு  மக்கள் விடுதலை முன்னணியின் ஒரு சில உறுப்பினர்கள் ஈர்க்கப்பட்டுள்ளதாகவும் சந்தேகம் காணப்படுகிறது.

சிலைகளை வழிபடுபவர்கள் கோத்திரர்கள் என மக்கள் விடுலை முன்னணியின் உறுப்பினர் பிமல் ரத்நாயக்க  அண்மையில் குறிப்பிட்டுள்ளார். சிலைகளை வழிபடுபவர்களுக்கு எதிராக செயற்பட்ட சஹ்ரான் போன்ற அடிப்படைவாதிகளின் கொள்கைக்கு ஈர்க்ப்பட்டவர்கள் சிலை வழிபாடுகளுக்கு எதிராக கருத்துரைப்பவர்களாக கருதப்படுவார்கள்.

 3 சதவீத மக்களாணையினை பெற்றுள்ள மக்கள் விடுதலை முன்னணிக்கு இனி மக்களின் ஆதரவு ஒருபோதும் கிடைக்கப் பெறாது. ஏப்ரல் 21 குண்டுத்தாக்குதல்  தொடர்பிலான  ஜனாதிபதி விசாரணை ஆணைக்குழுவின் அறிக்கையின் யோசனைகளை துரிதகரமாக செயற்படுத்த உரிய நடவடிக்கை முன்னெடுக்கப்பட்டுள்ளது என்றார்.