தவறவிடாதீர்கள்..!உடனே பதிவு செய்யுங்கள்

(செ.தேன்மொழி)

கொழும்பு விளக்கமறியல் சிறைச்சாலையில் கைதியொருவருக்கு வழங்குவதற்காக கொண்டு செல்லப்பட்ட ஆடைக்குள் மறைத்து வைத்து ஹெரோயின் போதைப் பொருளை எடுத்து சென்ற சந்தேக நபரொருவர் கைது செய்யப்பட்டுள்ளதாக சிறைச்சாலைகள் ஊடகப்பேச்சாளர் ஆணையாளர் (நிர்வாகம் மற்றும் புனர்வாழ்வு ) சந்தன ஏக்கநாயக்க தெரிவித்தார்.

கொழும்பு விளக்கமறியல் சிறைச்சாலையில் இன்று வியாழக்கிழமை பிற்பகல் 2 மணியளவில் கைதிகளை பார்வையிடுவதற்காக வருகைத்தந்திருந்த உறவினர்களை, சிறைச்சாலையில் புலனாய்வு பிரிவின் அதிகாரிகள் சோதனைச் செய்துள்ளனர்.

இதன்போது கைதியொருவருக்கு வழங்கும் பொருட்டு நபரொருவர் சில ஆடைகளை எடுத்துவந்துள்ளார்.

அந்த ஆடைகளை சோதனைச் செய்துள்ள புலனாய்வு அதிகாரிகள் , அதில் ஆண் காட்சட்டை ஒன்றுக்குள் மிகவும் சூட்சகமான முறையில் மறைத்து எடுத்துவரப்பட்ட ஹெரோயின் என சந்தேகிக்கப்படும் போதைப் பொருட்களை  கைப்பற்றியுள்ளனர்.

இதன்போது பொலிதீனைக் கொண்டு நன்கு சுருள் வடிவில் பொதிச் செய்யப்பட்டிருந்த , 14 சென்ரி மீட்டர் நீளமான 11 சுருள்களும் , 9 சென்ரி மீட்டர் நீளமான சுருள் ஒன்றும் கைப்பற்றப்பட்டுள்ளது. இந்த சுருள்களுக்குள் மறைத்து வைக்கப்பட்டிருந்த நிலையிலேயே குறித்த ஹெரோயின் போதைப் பொருட்கள் மீட்கப்பட்டுள்ளன.

இதனைத் தொடர்ந்து சந்தேக நபரை கைது செய்த புலனாய்வு பிரிவினர் ,  மேலதிக விசாரணைகளுக்காக அவரை பொரளை பொலிஸ் நிலையத்தில் ஒப்படைத்துள்ளனர்.