புதிய பொருளாதார தடைகளை விதித்தால் ஐரோப்பிய ஒன்றியத்துடனான உறவுகளை துண்டிக்க தயார் என்று ரஷ்யா அதிரடியாக தெரிவித்துள்ளது.

ரஷ்யாவின் எதிர்க்கட்சி தலைவர் அலெக்சி நவால்னியை கைதுசெய்து சிறை தண்டனை விதித்த விவகாரத்தில் ரஷ்ய அரசுக்கும் ஐரோப்பிய‌ ஒன்றியத்திற்கும் இடையே மோதல் போக்கு நீடித்து வருகிறது.

அலெக்சி நவால்னியை சிறை வைத்திருப்பது அரசியல் பழிவாங்கும் நடவடிக்கை எனத் தெரிவிக்கும் ஐரோப்பிய ஒன்றியம், அவரை உடனடியாக விடுவிக்கக்கோரி ரஷ்ய அரசுக்கு தொடர்ந்து அழுத்தம் கொடுத்து வருகிறது.

இந்த நிலையில் பொருளாதார ரீதியில் வலிமை மிகுந்த புதிய பொருளாதாரத் தடைகளை விதித்தால் ஐரோப்பிய ஒன்றியத்துடனான உறவுகளை துண்டிக்க தயாராக உள்ளதாக ரஷ்யா தெரிவித்துள்ளது.

இது குறித்து ரஷ்ய வெளியுறவு அமைச்சர் செர்ஜி லாவ்ரோவ் கூறுகையில்,

‘‘ஐரோப்பிய கூட்டமைப்பின் பொருளாதாரத் தடைகள்  நமது பொருளாதாரத்துக்கு அபாயங்களை உருவாக்கும். மேலும் இந்த தடைகளால் உறவுகளில் முறிவு ஏற்படக்கூடும்.

உலக விவகாரங்களிலிருந்து எங்களை தனிமைப்படுத்த நாங்கள் விரும்பவில்லை. ஆனால் நாங்கள் அதற்கு தயாராக இருக்க வேண்டும்’’ என்றார்.