தவறவிடாதீர்கள்..!உடனே பதிவு செய்யுங்கள்

(செ. தேன்மொழி)

பேலியகொட மற்றும் அத்துருகிரிய ஆகியபகுதிகளில் நேற்று வியாழக்கிழமை பொலிஸாருக்கு கிடைக்கப்பெற்ற தகவலுக்கமைய மேற்கொள்ளப்பட்ட சுற்றிவளைப்பின்போது ஐஸ் மற்றும் ஹெரோயின் ஆகிய போதைப் பொருளுடன் சந்தேகநபர்கள் நால்வர் கைது செய்யப்பட்டுள்ளனர்.

பேலியகொட மேம்பாலத்திற்கு அருகில் குற்றப்புலனாய்வு பிரிவினரால் மேற்கொள்ளப்பட்ட சுற்றிவளைப்பின்போது 5 கிராம் 240 மில்லிகிராம் ஹெரோயினுடன் களனி பகுதியைச் சேர்ந்த 47 வயதுடைய சந்தேகநபரொருவர் கைது செய்யப்பட்டுள்ளார்.

இதேவேளை, பேலியகொட - நவலோக்க சுற்றுவட்டத்திற்கு அருகில் ஐஸ் மற்றும் ஹெரோயின் போதைப் பொருளுடன் இரு சந்தேகநபர்கள் கைதுசெய்யப்பட்டுள்ளனர். 

இதன்போது சந்தேகநபர் ஒருவரிடமிருந்து 10 கிராம் ஐஸ் போதைப்பொருளும், மற்றையவரிடமிருந்து ஒரு கிராம் 500 மில்லிகிராம் ஹெரோயின் போதைப்பொருளும் கைப்பற்றப்பட்டுள்ளது. 

குறித்த சந்தேகநபர்கள் இருவரும் கிராண்ட்பாஸ் மற்றும் வெல்லம்பிட்டி பகுதிகளைச் சேர்ந்தவர்களாவர்.

மேலும் அத்துருகிரிய - ஹபரகட பகுதியில் 47 வயதுடைய சந்தேகநபரொருவர் 2 கிராம் 300 மில்லிகிராம் ஹெரோயினுடன்  கைதுசெய்யப்பட்டுள்ளார். ஹபரகட பகுதியைச் சேர்ந்த நபரே இவ்வாறு கைது செய்யப்பட்டுள்ளார். சந்தேகநபர்கள் தொடர்பான மேலதிக விசாரணைகளை பொலிஸார் முன்னெடுத்து வருகின்றனர்.