தவறவிடாதீர்கள்..!உடனே பதிவு செய்யுங்கள்

தரம் 6 முதல் 13 வரையான மாணவர்களுக்கு மூன்றாம் தவணை கல்வி நடவடிக்கைகளுக்காக பாடசாலைகள் இன்று (23.11.2020) காலை ஆரம்பமான நிலையில், மலையகத்திலுள்ள  பாடசாலைகளிலும் கல்விச் செயற்பாடுகள் சுகாதார பாதுகாப்பு ஏற்பாடுகளுக்கு மத்தியில் ஆரம்பித்துள்ளன.

மாணவர்கள் முகக்கவசம் அணிந்து, சமூக இடைவெளியைப் பின்பற்றி அச்சமின்றி வழமைபோல் பாடசாலைகளுக்கு வந்திருந்தாலும், மாணவர்களின் வருகையில் வீழ்ச்சி ஏற்பட்டிருந்தாக ஆசிரியர்கள் தெரிவித்துள்ளனர்.

மாணவர்கள் பாடசாலை வளாகத்துக்குள் வந்ததும், அவர்களின் உடல் வெப்பநிலை பரிசோதிக்கப்பட்டு, கைகளை கழுவிய பின்னரே  வகுப்பறைக்கு செல்ல அனுமதிக்கப்பட்டிருந்ததோடு, வகுப்பறையில் சமூக இடைவெளியைப் பின்பற்றும் விதத்தில் ஆசனங்கள் ஒதுக்கப்பட்டிருந்ததாகவும் தெரியவருகிறது. எனினும், ஒரு சில பாடசாலைகளில் இதனை காணமுடியவில்லையெனவும், அதற்கு வளப்பற்றாக்குறையே காரணம் எனவும் தெரியவந்துள்ளது.

அதேவேளை, அட்டன் கல்வி வலயத்திலுள்ள, அட்டன் வெளிஓயா மலைமகள் தமிழ் வித்தியாலயம், ஆக்ரோயா தமிழ் வித்தியாலயம் ஆகிய இரண்டு பாடசாலைகளும் இன்று திறக்கப்படவில்லை.

இப்பகுதிகளில் நேற்றைய தினம்(22) கொரோனா தொற்றாளர்கள் மூவர் அடையாளம் காணப்பட்டுள்ளனர். இதனையடுத்து அவர்களுடன் தொடர்பில் இருந்தவர்கள் தனிமைப்படுத்தப்பட்டுள்ளனர்.



இந்நிலையிலேயே பாடசாலைகள் திறக்கப்படவில்லையெனவும், அப்பகுதிகளில் இருந்து வேறு பாடசாலைகளுக்கு செல்லும் மாணவர்களை வீட்டில் இருந்தே கல்வி நடவடிக்கைகளை தொடருமாறு கோரப்பட்டுள்ளதாகவும் தெரியவருகிறது.