கொழும்பில் டெங்கு நோய் தலைதூக்கும் அபாயம்

அதிக மழையுடனான காலநிலை காரணமாக கொழும்பு நகரம் உட்பட ஒரு சில மாவட்டங்களில் டெங்கு நோய் மீண்டும் தலைதூக்கும் அபாயம் காணப்படுவதாக கொழும்பு மாநகர சபையின் தலைமை சுகாதார அதிகாரியும் மருத்துவருமான ருவன் விஜயமுனி தெரிவித்துள்ளார்.

இதனிடையே இவ்வருடத்தில் இதுவரையான காலப்பகுதியில் டெங்கு நோய் தொற்று காரணமாக 44 இற்கும் அதிகமானோர் மரணித்துள்ளதாகவும் சுட்டிகாட்டினார்.

இது தொடர்பில் அவர் தொடர்ந்து கருத்து தெரிவிக்கையில்,

நாட்டில் கடந்த இரண்டு வாரங்களாக மழையுடனான காலநிலை நிலவுகின்றது. இவ்வாறான நிலையில் கொழும்பு உட்பட நாட்டின் சில மாவட்டங்களில் மீண்டும் டெங்கு நோய் பரவும் அபாயம் தலை தூக்கியுள்ளது.

மறுபுறம் இக்காலப்பகுதியில் தொடர்ந்தும் கொழும்பு நகரத்தில் டெங்கு நோயாளர்களின் எண்ணிக்கை அதிகரித்துள்ளமையை அவதானிக்க முடிந்துள்ளதோடு இவ்வருடத்தின் கடந்த 11 மாதங்களில் நாடளாவிய ரீதியில் டெங்கு தொற்று நோய் காரணமாக 25000 இற்கும் மேற்பட்டோர் பாதிக்கப்பட்டுள்ளதோடு 44 இற்கும் மேற்பட்டோர் உயிரிழந்துள்ளதாகவும் தெரியவந்துள்ளது என்றார்.