சமஷ்டியை கொண்டுவர ஒருபோதும் அனுமதிக்கக்கூடாது

Published By: Ponmalar

14 Jul, 2016 | 06:46 PM

(எம்.ஆர்.எம்.வஸீம்)

நாட்டை துண்டாக பிரிக்கும் சமஷ்டி முறையை ஒருபோதும் அனுமதிக்க மாட்டோம். ஒற்றையாட்சியை ஏற்படுத்தவே இராணுவத்தினர் உயிரை தியாகம் செய்து போராடினர் என முன்னாள் பாராளுமன்ற உறுப்பினர் சரத் வீரசேகர தெரிவித்தார்.

தாய்நாடு எமது என்ற அமைப்பு இன்று கொழும்பில் நடத்திய செய்தியாளர் சந்திப்பில் கலந்துகொண்டு உரையாற்றுகையிலேயே அவர் இவ்வாறு தெரிவித்தார்.

அவர் அங்கு தொடர்ந்து கூறுகையில்,

அரசாங்கம் ஆட்சிக்கு வந்தது முதல் யுத்தத்தை வெற்றிகொண்ட இராணுவத்தினரை காட்டிக்கொடுக்கும் செயலையே மேற்கொண்டு வருகின்றது. நாட்டில் ஒற்றையாட்சி இடம்பெறவேண்டும் என்பதற்காகவே இராணுவத்தினர் 30 வருடகாலம் போராடி யுத்தத்தை வெற்றிகொண்டனர்.

ஆனால் அரசாங்கம் சமஷ்டி முறையை கொண்டுவந்து தோட்டத்தொழிலாளர்களுக்கு மலையகத்தையும், வடக்கை தமிழ் தேசிய கூட்டமைப்புக்கும். கிழக்கில் முஸ்லிம்களுக்கு தனி அலகு அமைப்பதற்கும் ஏற்றவாறு நாட்டை துண்டாட முயற்சிக்கின்றது இதனை ஒருபோதும் அனுமதிக்கக்கூடாது என அவர் தெரிவித்தார்.