தவறவிடாதீர்கள்..!உடனே பதிவு செய்யுங்கள்

(எம்.ஆர்.எம்.வஸீம்)

உயிர்த்த ஞாயிறு தாக்குதலுடன் சம்பந்தப்பட்ட குற்றவாளிகளை கைதுசெய்து சட்டத்துக்கு முன்நிறுத்த அரசாங்கம் நடவடிக்கை எடுக்கவேண்டும். மாறாக குறுகிய அரசியல் நோக்கத்துக்காக அப்பாவிகளை குற்றவாளியாக்குவதை நிறுத்திக்கொள்ளவேண்டும் என அகில இலங்கை மக்கள் காங்கிரஸ் தலைவர் ரிஷாத் பதியுதீன் தெரிவித்துள்ளார்.

உயிர்த்த ஞாயிறு தாக்குதல் இடம்பெற்று இன்றுடன் ஒருவடம் நிறைவடைந்துள்ள நிலையில் பாதிக்கப்பட்டவர்களுக்கு ஆறுதல் தெரிவித்து அவர் விடுத்திருந்த அறிக்கையிலேயே இவ்வாறு தெரிவிக்கப்பட்டுள்ளது.

அதில் மேலும் தெரிவிக்கப்பட்டுள்ளதாவது,

கடந்த வருடம் உயிர்த்த ஞாயிறு தினத்தில் ஆலயங்களில் மத வழிபாடுகளில் ஈடுபட்டுக்கொண்டிருந்தவர்கள் மீதும் நட்சத்திர ஹோட்டல்களிலும் மேற்கொள்ளப்பட்ட பயங்கரவாத குண்டுத்தாக்குதலில் நூற்றுக்கணக்கான அப்பாவிகள் கொல்லப்பட்டதுடன் பலர் படுகாயமடைந்திருந்தனர். தாக்குதலில் உயிரிழந்தவர்களின் குடும்பங்களுக்கு அனுதாபங்களை தெரிவிப்பதுடன் தாக்குதலில் பாதிக்கப்பட்டு இன்னும் நோயுற்றிருப்பவர்கள் விரைவில் குணமடைய பிராத்திக்கின்றோம்.

மேலும் பயங்கரவாத தாக்குதல் இடம்பெற்று ஒருவருடம் நிறைவடைந்துள்ள நிலையிலும் தாக்குதலுடன் தொடர்புபட்ட உண்மையான குற்றவாளிகளை கண்டுபிடித்ததாக தெரியவில்லை. மாறாக குறுகிய அரசியல் நோக்கத்துக்காக அரசியல் பழிவாங்கும் நோக்கில் கைதுகள் இடம்பெற்று வருகின்றதாகவே தெரிகின்றது.

அதனால்  தாக்குதலுடன் சம்பந்தப்பட்ட குற்றவாளிகளை கைதுசெய்து சட்டத்துக்கு முன் நிறுத்த அரசாங்கம் நடவடிக்கை எடுக்கவேண்டும். மாறாக குறுகிய அரசியல் நோக்கத்துக்காக அப்பாவிகளை குற்றவாளிகளாக்குவதை நிறுத்திக்கொள்ளவேண்டும். ஏனெனில் பாதிக்கப்பட்ட சமூகத்தில் இருந்து வந்தவன் என்றவகையில் பயங்கரவாதத்தினால் ஏற்படும் துயரங்களை நான் நன்கு உணர்கின்றேன்.