தவறவிடாதீர்கள்..!உடனே பதிவு செய்யுங்கள்

நேற்று நடைபெற்ற வீதிப் பாதுகாப்பு இருபதுக்கு : 20 உலகக் கிண்ண கிரிக்கெட் தொடரில் இலங்கை லெஜன்ட் அணி அவுஸ்திரேலிய அணியை 7 ஓட்டங்களினால் வீழ்த்தி வெற்றி பெற்றுள்ளது.

5 அணிகள் கலந்து கொள்ளும் 2020 ஆம் ஆண்டுக்கான வீதிப் பாதுகாப்பு இருபதுக்கு : 20 உலகக் கிண்ண கிரிக்கெட் தொடர் இந்தியாவில் ஆரம்பமாகி இடம்பெற்று வருகின்றது.

இதில் நேற்றிரவு இடம்பெற்ற இரண்டாவது போட்டியில் பிரட் லீ தலைமையிலான அவுஸ்திரேலிய லெஜன்ட் அணியும் திலகரத்ன தில்ஷான் தலைமையிலான இலங்கை லெஜன்ட் அணிகளும் மோதின.

இப் போட்டியானது நேற்றிரவு 7.00 மணியளவில் மும்பை வான்கடே மைதானத்தில் நடைபெற்றது.

போட்டியில் முதலில் துடுப்பெடுத்தாடிய இலங்கை அணியானது நிர்ணயிக்கப்பட்ட 20 ஓவர்களில் 8 விக்கெட்டுக்களை இழந்து 161 ஓட்டங்களை குவித்தது.

இலங்கை அணி சார்பில் ரோமேஸ் களுவிதாரன 30 ஓட்டங்களையும், சாமர கபுகெதர 20 ஓட்டங்களையும் அதிகபடியாக பெற்றனர்.

162 ஓட்டம் என்ற வெற்றியிலக்கை நோக்கி பதிலுக்குத் துடுப்பெடுத்தாடிய அவுஸ்திரேலிய அணியானது 19.5 ஓவரில் அனைத்து விக்கெட்டுக்களையும் இழந்து 154 ஓட்டங்களை மாத்திரம் பெற்று 7 ஓட்டங்களினால் தோல்வியைத் தழுவியது.

அவுஸ்திரேலிய அணி சார்பில் நேதன் ரியர்டன் 53 பந்துகளை எதிர்கொண்டு 5 சிக்ஸர்கள், 9 பவுண்டரிகள் அடங்கலாக 96 ஓட்டங்களை அணி சார்பில் அதிகபடியாக பெற்றார்.

பந்து வீச்சில் இலங்கை அணி சார்பில் திலகரத்ன தில்ஷான் 3 விக்கெட்டுக்களையும், ரங்கன ஹேரத், மெளரூப் ஆகியோர் தலா 2 விக்கெட்டுக்களையும், சமிந்த வாஸ் மற்றும் சசித்ர சேனாநாயக்க ஆகியோர் தலா ஒவ்வொரு விக்கெட்டுக்களையும் கைப்பற்றினர்.

இதேவேளை நாளை மறுதினம்  இடம்பெறவுள்ள ஆட்டத்தில் இந்திய லெஜன்ட் அணியை இலங்கை அணி எதிர்கொள்ளவுள்ளது. இப் போட்டியானது நாளை இரவு 7.00 மணிக்கு மும்பையில் இடம்பெறவுள்ளமை குறிப்பிடத்தக்கது.