தவறவிடாதீர்கள்..!உடனே பதிவு செய்யுங்கள்

இலங்கையைச் சேர்ந்த 7 பேர் நைஜீரியாவின் லாகோஸ் மாநிலத்தில் உள்ள பீக்ராஃப்ட் கடற்படை தளத்தில் தடுத்து வைக்கப்பட்டுள்ளதாக வெளியுறவு அமைச்சம் தெரிவித்துள்ளது.

கடந்த டிசம்பர் மாதம் 12 ஆம் திகதி அன்று நைஜீரிய கடற்படை, எம்டி ஜீப்ரூக் என்ற வெளிநாட்டு கப்பலை நைஜீரிய கடற்பரப்பில் தடுத்து நிறுத்தியது.

இதன்போது கப்பலில் சட்டவிரோதமாக கடத்தப்பட்ட 838 மெட்ரிக் தொன் கச்சா எண்ணெயும் மீட்கப்பட்டது. இதன்போதே கப்பலில் பணியாற்றிய 7 இலங்கையர்களையும் நைஜீரிய கடற்படையினர் கைதுசெய்துள்ளதுடன், அவர்களை பீக்ராஃப்ட் கடற்படை தளத்தில் தடுத்தும் வைத்துள்ளனர்.

இந்த கச்சா எண்ணெய் கடத்தல் தொடர்பில் நைஜீரிய கடற்படை வழக்குத் தொடர்ந்துள்ளதுடன், குறித்த வழக்கை நைஜீரியாவின் பொருளாதார மற்றும் நிதி குற்ற ஆணையத்திடம் ஒப்படைத்துள்ளது.

இதனிடையே தாம் பயணித்த கப்பலில் சட்டவிரோதமான முறையில் கச்சா எண்ணெய் கடத்தப்படுவது என்பதை தாம் அறிந்திருக்கவில்லை என தடுத்து வைக்கப்பட்டுள்ள இலங்கையர்கள் சுட்டிக்காட்டியுள்ளனர்.

எவ்வாறெனினும் தடுத்து வைக்கப்பட்டுள்ள இலங்கையர்களை நைஜீரியாவில் உள்ள இலங்கை உயர் ஸ்தானிகராலய அதிகாரிகள் பெப்ரவரி 20 ஆம் திகதி சென்று பார்வையிட்டுள்ளனர்.

அது மாத்திரமின்றி அவர்களை விடுதலை செய்து விரைவாக இலங்கைக்கு அனுப்புமாறும் நைஜீரிய அதிகாரிகளடம் அவர்கள் கோரிக்கை விடுத்துள்ளனர்.

எனினும் இந்த வழக்கை நைஜீரியாவின் பொருளாதார மற்றும் நிதி குற்ற ஆணையகம் பரிசீலித்து வருவதாகவும், அவர்கள் நிரபராதிகள் என்பது நிரூபிக்கப்படால் அவர்கள் விடுதலை செய்யப்படுவார்கள் எனவும் அந் நாட்டு அதிகாரிகள் தெரிவித்தனர். 

குறித்த கப்பல் உரிமையாளரும் கப்பல் முகவரும் இதுவரை தடுத்து வைக்கப்பட்டுள்ள இலங்கையர்களுக்கு முறையான சட்ட உதவிகளை மேற்கொள்ளவில்லை எனவும் சுட்டிக்காட்டப்பட்டுள்ளது.