தவறவிடாதீர்கள்..!உடனே பதிவு செய்யுங்கள்

(ஆர்.யசி, எம்.ஆர்.எம்.வசீம் )

என்னை கொலை செய்யுமாறு ரஞ்சன் ராமநாயகவிற்கு  முன்னாள் பிரதமர் ரணில் விக்கிரமசிங்க ஆணையிடும் குரல்பதிவு வெளியாகியுள்ளது. என்னை கொலைசெய்யும்படி ரஞ்சன் ராமநாயகவை ஏவிவிட்டது ரணில் விக்கிரமசிங்க என்பது தெளிவாக தெரிகின்றது என இராஜாங்க அமைச்சர் மஹிந்தானந்த அளுத்கமகே சபையில் கூறினார். 

அத்துடன் இது குறித்து பொலிஸில் முறையிடவுள்ளதாகவும் சபாநாயகர் இது குறித்து உடனடியாக நடவடிக்கை எடுக்க வேண்டும். எதிர்க்கட்சி தலைவர் சஜித் பிரேமதாச இது குறித்து தமது நிலைப்பாட்டை அறிவிக்க வேண்டும் என சபையில் தெரிவித்தும் எதிர்க்கட்சி தலைவர் மௌனம் காத்தார். 

பாராளுமன்றத்தில் இன்று சிறப்புரிமை மீறல் பிரச்சினை  முன்வைத்து கருத்து தெரிவிக்கும் போதே அவர் இதனைக் கூறினார்.

இதன்போது ஒழுங்குப்பிரச்சினை எழுப்பிய நிமல் லான்சா கூறுகையில்:-  பாராளுமன்ற உறுப்பினர்களின் பாவனைக்கு வழங்கப்படும் சட்ட பூர்வமான துப்பாக்கியில் 10 அல்லது  9 தோட்டாக்கள் மட்டுமே கொடுக்க சட்ட அங்கீகாரம் உள்ளது. ஆனால் ரஞ்சன் ராமநாயகவிற்கு மட்டும் 150 தோட்டாக்கள் வழங்கப்பட்டுள்ளது. இது எவ்வாறு வழங்கப்பட்டது? இது குறித்து தெளிவான விளக்கம் ஒன்று வழங்கப்பட வேண்டும். எதிர்க்கட்சி தலைவர் தெளிவான பதில் ஒன்றினை கூற வேண்டும் என்றார்.

இதன்போது ஒழுங்குப்பிரச்சினை எழுப்பிய எதிர்க்கட்சி உறுப்பினர் சுஜீவ சேனசிங்க கூறுகையில்:- இந்த செயற்பாடு மிகவும் மோசமானது, ஒரு பாராளுமன்ற உறுப்பினரின் பாதுகாப்பை உறுதிப்படுத்த நடவடிக்கை எடுக்க வேண்டும். அதற்கான் தெளிவான வேலைத்திட்டம் ஒன்றினை முன்னெடுக்க வேண்டும் என வலியுறுத்தினார்.  எனினும் சபையில் இருந்த எதிர்க்கட்சி தலைவர் இது குறித்து எந்தவித கருத்தையும் முன்வைக்காது மௌனமாக இருந்தார்.