தமிழ் தலைமைகளை பிரதமர் ஏமாற்றவில்லை : பிரதமருடன் இணைந்து தமிழ் தலைமைகளே ஏமாற்றுகின்றன - வியாழேந்திரன்

Published By: Daya

26 Sep, 2019 | 04:04 PM

(ஆர்.விதுஷா)

தமிழ்த் தலைமைகளை பிரதமர் ரணில் விக்கிரமசிங்க ஏமாற்றவில்லை. மாறாக தமிழ் தலைமைகள் அவருடன் இணைந்து தமிழ் மக்களை ஏமாற்றுகின்றார்கள் என்று தெரிவித்த மட்டக்களப்பு மாவட்ட பாராளுமன்ற உறுப்பினர் எஸ்.வியாழேந்திரன், ஜனாதிபதி வேட்பாளர் நியமனம் தொடர்பில் தமது கட்சிக்குள் தீர்க்கமான முடிவை காணமுடியாதவர்களை நம்பி மீண்டும் சிறுபான்மை மக்கள் ஏமாறுவதா என்றும் கேள்வியெழுப்பினார்.

எதிர்க்கட்சித்தலைவர் அலுவலகத்தில் நேற்று புதன்கிழமை இடம்பெற்ற ஊடகவியலாளர் சந்திப்பின் போது இவ்வாறு தெரிவித்த அவர் தமிழ் மக்கள் மீண்டும் பிரதமர் ரணில் விக்கிரமசிங்கவை ஆதரிப்பதென்பது தற்கொலைக்கு சமனானதாகும் எனவும் அவர் குறிப்பிட்டார்.

அவர் அங்கு மேலும் கூறியதாவது,

சிறுபான்மையின மக்களுடைய பிரச்சினைக்கு இதுவரையில் தீர்வு காணப்படவில்லை. ஐக்கிய தேசிய கட்சியின் ஜனாதிபதி வேட்பாளர் நியமனம் தொடர்பில் இது வரையில் தீர்க்கமான முடிவு எதுவும் எட்டப்படவில்லை. அவர்களின் பங்காளிக்கட்சிகள் ஜனாதிபதி வேட்பாளரை தீர்மானிக்கும் நிலைக்கு அவர்களுடைய தலைமைத்துவம் பலவீனமானதாக இருக்கிறது.

சஜித் பிரேமதாசவை ஜனாதிபதி வேட்பாளராக அறிவிக்க வேண்டுமெனின் சில நிபந்தனைகளுக்கு அவர் உடன்பட வேண்டும் என்று பிரதமர் ரணில் விக்கிரமசிங்க கூறியிருக்கின்றார். அந்த நிபந்தனைகளுக்கு உடன்பட்டு வருபவர் ஜனாதிபதியானால், அவர் ஒரு பொம்மையாகத்தான் நாட்டில் இருக்க நேரிடும். மீண்டும் ஆட்சி அதிகாரம் அனைத்தும் பிரதமர் ரணில் விக்கிரமசிங்கவிடமே இருக்கும்.

கடந்த நான்கு வருட காலங்களுக்குள் தேசிய இனப்பிரச்சினைக்கான தீர்வு என்னும் விடயத்தில் தமிழ் தலைமைகளை இந்த அரசாங்கம் மிக கச்சிதமாக ஏமாற்றியிருக்கின்றது. எமது மக்களுடைய உடனடிப் பிரச்சினைகளான காணிவிடுவிப்பு உள்ளிட்ட பிரச்சினைகளுக்கு இதுவரையில் தீர்வு காணப்படவில்லை. காணிவிடுவிப்பு தொடர்பிலான பிரச்சினையை எடுத்துக்கொண்டால் பகுதியளவில் அதற்கு தீர்வு காணப்பட்டுள்ளது. முழுமையான தீர்வு இது வரையில் காணப்படவில்லை.

வடக்கு – கிழக்கில் முன்னேற்றகரமான செயற்பாடுகள் இடம் பெற்றுள்ளதாயின் அவை ஜனாதிபதி மைத்திரிபால சிறிசேன வினாலேயே முன்னெடுக்கப்பட்டுள்ளன. பிரதமர் ரணில் விக்கிரமசிங்கவோ, அவ ருக்கு ஆதரவு தெரிவித்துக்கொண்டிருக்கும் தமிழ் தேசிய கூட்டமைப்போ அதற்கு உரிமை கோர முடியாது. அரசியல் கைதிகளின் விடுதலை மற்றும் காணாமல் ஆக்கப்பட்டோர் தொடர்பிலான விடயங்களில் எத்தகைய முனேற்றமும் இது வரையில் எட்டப்படவில்லை.

இந்த அரசாங்கம் வடக்கு – கிழக்கு மாகாணங்களில் எந்த அபிவிருத்தி பணிகளை யும் சரிவர செய்யவில்லை.

தமிழ் மக்களை ஏமாற்றும் செயற்பாடுகளே தொடர்ந்தும் இடம் பெற்று வருகின்றன. ஆகவே இத்தகையதோர் நிலையில் தமிழ்த் தலைமைகளை பிரதமர் ரணில் விக்கிரமசிங்க ஏமாற்றவில்லை. மாறாக தமிழ் தலைமைகள் அவருடன் இணைந்து தமிழ் மக்களை ஏமாற்றிக்கொண்டு இருக்கின்றார்கள்.

கேள்வி: பொதுஜன பெரமுனவின் ஜனாதிபதி வேட்பாளர் கோத்தபாய ராஜபக் ஷவை தமிழ் மக்கள் ஏற்றுக்கொள்வார்களா?

பதில் : 2009 யுத்தத்தின் பின்னர் அந்த காயங்கள் ஆறாத நிலையில் தமிழ் தலைமைகள் சரத் பொன்சேகாவை ஆதரியுங்கள் என கூறியபோது வடக்கு – கிழக்கு மக்கள் அவருக்கு பெருமளவில் ஆதரவளித்தார்கள். இந்நிலையில், யுத்த குற்றவாளிகளுக்கு தண்டனை வழங்குவோம், ஊழல் மோசடிகளுக்கு தீர்வு காண்போம் எனக்கூறிக்கொண்டு ஆட்சிக்கு வந்த நல்லாட்சி அரசாங்கம் அதற்கான எந்த தீர்வையும் காணவில்லை. தமிழ் தலைமைகளின் வாக்குறுதிகளை நம்பி நல்லாட்சி அரசாங் கத்துக்கு வாக்களித்து தமிழ் மக்கள் ஏமாந்து போயுள்ளார்கள். சிறிய விடயங்களுக்கு கூட தீர்வு இல்லை. ஆகவே, வடக்கு–கிழக்கில் உள்ள சில கட்சிகள் கோத்தபாயவிடம் சில நிபந்தனைகளை முன்வைத்து அவருக்கு வாக்களிக்க தயாராகும் செயற்பாடுகளை மேற்கொண்டு வருகின்றனர். ஆயினும், யுத்தகுற்றங்கள் உள்ளிட்ட விடயங்களை நாம் நியாயப்படுத்தவில்லை. மாறாக தொடர்ந்தும் தமிழ் மக் கள் ஏமாற்றப்படும் செயற்பாட்டை முடிவுக்கு கொண்டு வரவேண்டும்.

செம்மலை ஆலய விவகாரம்

பௌத்த மதகுருமார், கோவில் வளாகத்துக்குள் பிக்கு ஒருவரின் உடலை கொண்டு சென்று தகனம் செய்தனர் என்பதனை ஏற்றுக்கொள்ள முடியாது. ஒரு சிலருடைய இந்த நடவடிக்கை வேதனைக்குரிய விடயமாகும். ஒரு இன மக்கள் செறிந்து வாழும் பகுதியில் இன்னுமொரு இன மக்கள் அழுத்தத்தை பிரயோகிக்கும் போதுதான் இன நல்லுறவை சீர்குலைக்கும் செயற்பாடு ஆரம்பிக்கின்றது. ஆகவே நீதிமன்ற உத்தரவுக்கு அப்பால் சென்று இந்த செயல் இடம் பெற்றிருக்கின்றது. இந்நிலையில் நீதித்துறையின் சுதந்திரம் பாதுகாக்கப்படவேண்டியது அவசியமானதாகும்.

இந்த செயலையிட்டு தான் வெட்கி தலை குனிவதாக பிரதமர் விக்கிரமசிங்க கூறியிருக்கின்றார். இந்த விடயம் சிங் கள ஊடகங்களில் சிங்கள மக்கள் மத்தி யில் சொல்லப்பட்டிருக்கவில்லை. மாறாக தமிழ் மக்கள் மத்தியிலேயே கூறப்பட்டி ருக்கின்றது. ஆகவே, பிரதமர் ரணில் விக்கிரமசிங்க சிறுபான்மை மக்களின் வாக்குகளை பெறுவதற்கு மேற்கொள்ளும் கபடநாடகமாகவே இதனை கருத வேண்டும். தென்னிலங்கைக்கு ஒரு முகத்தையும் தமிழ் மக்களுக்கு வேறு முகத்தையும் காட்டும் செயலையே அவர் மேற்கொண்டு வருகின்றார்.