தவறவிடாதீர்கள்..!உடனே பதிவு செய்யுங்கள்

உலகக் கிண்ணத் தொடரின் இறுதிப் போட்டியில் இறுதி ஓவரில் களத்தடுப்பின் போது மார்ட்டின் குப்தில் எறிந்த பந்துக்கு 6 ஓட்டங்கள் வழங்கியது தவறு என முன்னாள் நடுவர்கள் கருத்துத் தெரிவித்துள்ளனர்.

ஆட்டத்தில் கடைசி ஓவரில் நியூஸிலாந்து வேகப்பந்து வீச்சாளர் டிரெண்ட் போல்ட் வீசிய 4ஆவது பந்தில் பென் ஸ்டோக் 2 ஓட்டங்கள் ஓடிய போது நியூஸிலாந்து பீல்டர் மார்ட்டின் குப்தில் ஸ்டம்பை நோக்கி பந்தை எறிந்தார். அந்தப் பந்து கிரீசுக்குள் விழுந்த பென் ஸ்டோக்ஸ் துடுப்பு மட்டையில் பட்டு பவுண்டரியைத் தாண்டியது. இதனால் அந்தப் பந்தில் 6 ஓட்டங்களை நடுவர் வழங்கினார். கள நடுவர்கள் குமார் தர்மசேன(இலங்கை), மாரிஸ் (தென்னாபிரிக்கா) ஆகியோர் இந்த விஷயத்தில் தவறு இழைத்து விட்டதாக சர்ச்சை எழுந்துள்ளது. 

அந்தப் பந்தில் 5 ஓட்டங்கள் தான் வழங்கியிருக்க வேண்டும். 5 ஓட்டங்கள் வழங்கியிருந்தால் ஆட்டம் டை ஆக வாய்ப்பு இருந்திருக்காது. 

இது குறித்து முன்னாள் சர்வதேச நடுவர் சிமோன் டபெல் (அவுஸ்திரேலியா) கருத்துத் தெரிவிக்கையில், 

"இங்கிலாந்து அணிக்கு அந்தப் பந்தில் 5 ஓட்டங்கள் தான் வழங்கியிருக்க வேண்டும். 6 ஓட்டங்கள் வழங்கியிருக்கக் கூடாது. இது தெளிவான தவறு. கணிப்பதில் தவறு நடந்துள்ளது" என்றார். முன்னாள் சர்வதேச நடுவர் ஹரிஹரன் (இந்தியா) அளித்த பேட்டியில், "நியூசிலாந்து அணியின் உலகக் கிண்ண வாய்ப்பை நடுவர் குமார் தர்மசேன கொன்று விட்டார். அந்தப் பந்துக்கு 5 ஓட்டங்கள் தான் வழங்கி இருக்க வேண்டும்" என்று தெரிவித்துள்ளார். இது குறித்து ஐ.சி.சி. செய்தித் தொடர்பாளரிடம் கேட்ட போது, "நடுவர்கள் விதிமுறையின் படி தான் முடிவு எடுக்கிறார்கள். இது குறித்து நாங்கள் கருத்து சொல்ல முடியாது" என்று பதிலளித்தார்.