ஜனாதிபதியின் கூற்று தமிழரின் போராட்டத்தை கொச்சைப்படுத்தும் செயல் - சுமந்திரன்

02 Jul, 2019 | 10:49 AM

“போதைப்பொருள் வர்த்தகம் நடத்தியே தமிழர் ஆயுதப் போராட்டம் நடந்ததாக ஜனாதிபதி கூறியிருப்பது ஒட்டுமொத்த தமிழர் போராட்டத்தையே கொச்சைப்படுத்தும் செயல். இதனை நான் வன்மையாக கண்டிக்கிறேன் என்று தமிழ்த் தேசியக் கூட்டமைப்பின் பேச்சாளரும், ஜனாதிபதி சட்டத்தரணியுமான எம்.ஏ.சுமந்திரன் எம்.பி. தெரிவித்துள்ளார்.

கொழும்பில் நேற்று நடைபெற்ற நிகழ்வில் உரையாற்றிய ஜனாதிபதி மைத்திரிபால சிறிசேன, பிரபாகரன் போதைப்பொருள் வர்த்தகத்தில் ஈடுபட்டு ஆயுதப் போராட்டத்தை நடத்தியதாக குறிப்பிட்டிருந்தார்.

இது குறித்து கருத்துகேட்டபோதே சுமந் திரன் எம்.பி. மேற்கண்டவாறு தெரிவித்துள் ளார்.

இது குறித்து அவர் மேலும் கருத்து தெரிவிக்கையில், “பிரபாகரன் நடத்திய போராட்டத்திற்கு தமிழ் மக்களின் ஆதரவு இருந்தது. புலம்பெயர் தேசங்களில் இருந்து தமிழர்கள் அதற்கு பெருமளவான நிதிப் பங்களிப்பை செய்திருக்கிறார்கள்.இந்த பின்னணியில் வரலாறு தெரியாமல் இப்படி ஜனாதிபதி கூறுவது முற்றுமுழுதான தவறு.அதனை நான் கண்டிக்கிறேன். இது ஆயுதப்போராட்டத்தை கொச்சைப்படுத்தும் ஒரு பொய்த்தகவல்.இப்படி ஒரு குற்றச்சாட்டு முன்னெப்போதும் இருந்ததில்லை என்றார்.