தவறவிடாதீர்கள்..!உடனே பதிவு செய்யுங்கள்

(எம்.மனோசித்ரா)

உத்தேச ஜனாதிபதி தேர்தலில் வேட்பாளர் ஸ்ரீலங்கா சுதந்திர கட்சியிலிருந்தே தெரிவு செய்யப்பட வேண்டும் என்று கட்சி மத்திய குழு கூட்டத்தில் தீர்மானம் நிறைவேற்றப்பட்டுள்ளதாக அதன் பொதுச் செயலாளர் தயாசிறி ஜயசேகர தெரிவித்தார். 

ஸ்ரீலங்கா சுதந்திர கட்சியின் தலைவர் ஜனாதிபதி மைத்திரிபால சிறிசேனவின் தலைமையில் ஜனாதிபதி செயலகத்தில் நேற்று இடம்பெற்ற மத்திய குழு கூட்டத்தில் சகல சுதந்திர கட்சி உறுப்பினர்களும், முக்கிய பிரதிநிதிகளும் கலந்து கொண்டனர்.    

இதன்போது எதிர்வரும் ஜனாதிபதி தேர்தல் மற்றும் மாகாணசபைத் தேர்தல்கள் குறித்து விஷேட கவனம் செலுத்தப்பட்டுள்ளது. இவ்வாறு தேர்தல்கள் தொடர்பான கலந்துரையாடலின் போது ஜனாதிபதி தேர்லில் சுதந்திர கட்சியின் உறுப்பினர் ஒருவரே வேட்பாளராகக் களமிறக்கப்பட வேண்டும் என்று முன்வைக்கப்பட்ட யோசனை நிறைவேற்றப்பட்டுள்ளது. 

குறித்த வேட்பாளர் யார் என்று பெயர் குறிப்பிடப்படவில்லை. எனினும் ஜனாதிபதி மைத்திரிபால சிறிசேனவே மீண்டும் வேட்பாளராகப் போட்டியிட வேண்டும் என்பதே அனைவரதும் விருப்பம் என்று ஜனாதிபதியிடம் தெரிவிக்கப்பட்டதாக தயாசிறி ஜயசேகர மேலும் தெரிவித்தார். 

அத்தோடு புதன்கிழமை பொதுஜன பெரமுனவுடனான கூட்டணி தொடர்பில் இடம்பெற்ற ஆறாம் சுற்று பேச்சுவார்த்தை குறித்தும் கவனம் செலுத்தப்பட்டுள்ளது. 

இந்த ஆறாம் சுற்று பேச்சுவார்த்தையின் போது இருதரப்பு கோரிக்கைகளும் முன்வைக்கப்பட்டுள்ளன. முன்வைக்கப்பட்டுள்ள கோரிக்கைகள் தொடர்பாக ஆராய்வதற்கு விஷேட குழுவொன்றும் நியமிக்கப்பட்டுள்ளதாகவும் அவர் குறிப்பிட்டார்.