தவறவிடாதீர்கள்..!உடனே பதிவு செய்யுங்கள்

பரிசீலனை என்ற போர்வையில் பதுளை பாத்திமா முஸ்லீம் மகளீர் கல்லூரிக்குச் சென்ற பதுளை கல்வி வலய உத்தியோகஸ்தர்கள் குழு அக்கல்லூரியிலிருந்து தனிப்பட்ட மற்றும் கல்லூரியின் உள்ளார்ந்த விடயங்கள் அடங்கிய கோவைகளை இரகசியமாக எடுத்துச் சென்றுள்ளதாகக் கல்லூரி அதிபர் எம்.ஏ. ஹய்ருப் நிசா குறிப்பிட்டார்.

மேலும் இவ்விடயம் தொடர்பாக ஊவா மாகாண ஆளுநர் மார்ஷல் பெரேரா உள்ளிட்ட கல்வித் திணைக்கள உயர் அதிகாரிகள் ஆகியோரிடமும் முறைப்பாடு செய்யப்பட்டுள்ளதாகக் கல்லூரி அதிபர் மேலும் கூறினார்.

கடந்த 13 ஆம் திகதி (13-06-2019 )பதுளை வலயக் கல்வி அதிகாரிகள் குழுவினர் கல்லூரி பரிசீலனை என்ற பெயரில், கல்லூரிக்குள் நுழைந்தனர். அதையடுத்து மேற்கொண்ட பரிசீலனையின் பின்னர், கல்லூரியின் முக்கிய கோவைகளையும் எடுத்துச் சென்றுள்ளமை தெரியவந்துள்ளது.

இப்பரிசீலனை இடம்பெறுகையில் கல்லூரியில் உள்ளார்ந்த முக்கிய கூட்டம் இடம்பெற்றதால் பரிசீலனையை மேற்கொள்ளுமாறு வலயக் கல்வி அதிகாரிகளிடம் கூறிவிட்டுத் தான் கூட்டத்திற்குச் சென்று விட்டதாகக் கல்லூரி அதிபர் தெரிவித்தார். 

கூட்டம் முடிந்து நான் கல்லூரி அலுவலகத்திற்குச் சென்று கோவைகளைப் பரிசீலனை செய்த போது முக்கிய சில கோவைகளை அங்குகாணவில்லை. அது குறித்து கல்லூரி அலுவலக உதவியாளரிடம் வினவியபோது பரிசீலனை செய்த வலயக் கல்வி அதிகாரிகள் எடுத்துச் சென்றதாகக் கூறினார்.

இதையடுத்து,  நான் உடனடியாக கல்லூரி அபிவிருத்திச் சங்கத்தைக் கூட்டி விடயத்தை தெளிவுபடுத்தியுள்ளேன். கல்லூரிக்குக் களங்கத்தை ஏற்படுத்த இக் கோவைகளை எடுத்துச் சென்றிருப்பார்களோ என்ற சந்தேகமும் தனக்கு ஏற்பட்டிருப்பதாக அதிபர் தெரிவித்தார்.