அடக்குமுறைகளைத் தடுப்பதற்கு சர்வதேசத்தின் தலையீடு தேவை - சம்பந்தன் ஆஸி. தூதுவருக்கு வலியுறுத்தல்

30 May, 2019 | 10:30 AM

இலங்கையில் உயிர்த்த ஞாயிறு தினத்தன்று இடம்பெற்ற தாக்குதலின் பின்னர் சிறுபான்மை இன மக்களைக் குறிவைத்து அடக்குமுறைகள் தொடர்கின்றன. அவற்றை உடனடியாக சர்வதேச சமூகம் தடுத்து நிறுத்த வேண்டும். அப்பாவி மக்கள் பாதிக்கப்படுவதற்கு இடமளிக்கக்கூடாது. அதேவேளை, தாக்குதலின் பின்னணியில் இருந்தவர்கள் மற்றும் நேரடியாகத் தொடர்புபட்டவர்கள் என அனைவரும் தண்டிக்கப்பட வேண்டும் என்று தமிழ்த் தேசியக் கூட்டமைப்பின் தலைவர் இரா.சம்பந்தன் வலியுறுத்தியுள்ளார்.

இலங்கைக்கான அவுஸ்திரேலியத் தூதுவராகப் புதிதாக நியமிக்கப்பட்டுள்ள டேவிட் ஹொலிவுக்கும் தமிழ்த் தேசியக் கூட்டமைப்பின் தலைவர் இரா.சம்பந்தனுக்கும் இடையே நேற்றுமுன்தினம் சந்திப்பு நடைபெற்றது. இதன்போதே சம்பந்தன் இவ்வாறு தெரிவித்துள்ளார்.

அவர் மேலும் தெரிவித்ததாவது,இந்தச் சந்திப்பில் இலங்கையில் சிறுபான்மை இன மக்கள் எதிர்நோக்கும் பிரச்சினைகள், காணி விடுவிப்பு, மீள்குடியேற்றம், தமிழ் அரசியல் கைதிகள் விடுதலை விவகாரம், தேசிய இனப்பிரச்சினைக்கான அரசியல் தீர்வு, ஐ.நா. தீர்மானத்தின் பரிந்துரைகள் மற்றும் இலங்கை விவகாரத்தில் அவுஸ்திரேலியாவின் பங்களிப்பு தொடர்பில் விரிவாகப் பேசினோம்.

கடந்த ஏப்ரல் 21ஆம் திகதி – உயிர்த்த ஞாயிறன்று இடம்பெற்ற தாக்குதலின் பின்னர் சிறுபான்மை இன மக்களைக் குறிவைத்து கைதுகள், சோதனைகள், கெடுபிடிகள் மற்றும் வன்முறைகள் தொடர்கின்றன. அவசரகாலச் சட்டத்தால் எமது மக்கள் ஒன்றும் செய்ய முடியாது அச்சத்தில் வாழ்கின்றனர். எனவே, இந்த அடக்குமுறைகளை சர்வதேச சமூகம் உடன் தடுத்து நிறுத்த வேண்டும். அப்பாவி மக்கள் பாதிக்கப்படுவதற்கு இடமளிக்கக்கூடாது.

கிறிஸ்தவ மக்கள் மற்றும் வெளிநாட்டுப் பயணிகளை இலக்குவைத்து நடத்தப்பட்ட இந்த மிலேச்சத்தனமான தாக்குதலின் பின்னணி என்ன என்பது தொடர்பில் உண்மைகள் வெளிக்கொணரப்பட வேண்டும். உண்மைகள் மறைக்கப்படக்கூடாது. தாக்குதலின் பின்னணியில் இருந்தவர்கள் மற்றும் நேரடியாகத் தொடர்புபட்டவர்கள் அனைவரும் சட்டத்தின் முன் நிறுத்தப்பட வேண்டும்.

இந்தத் தாக்குதலின் பின்னர் பல இடங்களில் வன்முறைச் சம்பவங்கள் இடம்பெற்றுள்ளன. பெரும்பான்மை இனத்தைச் சேர்ந்தவர்கள் இந்த வன்முறைகளில் ஈடுபட்டுள்ளதைக் காணொளிகள் ஊடாகக் காணமுடிகின்றது.

உயிர்த்த ஞாயிறு தினத்தன்று இடம்பெற்ற தாக்குதல் மற்றும் அதன் பின்னர் இடம்பெற்ற வன்முறைச் சம்பவங்கள் அரசியல் பின்னணியில் அரங்கேறியுள்ளதா என்ற சந்தேகம் வலுப்பெற்றுள்ளது. யார் குற்றமிழைத்திருந்தாலும் அவர்கள் அனைவரும் கைதுசெய்யப்பட்டு இன, மத, பதவி வேறுபாடின்றி தண்டிக்கப்பட வேண்டும். இதை சர்வதேச சமூகமும் வலியுறுத்த வேண்டும் எனவும் அவுஸ்திரேலி யாத் தூதுவரிடம் எடுத்துரைத்தேன்.

வடக்கு, கிழக்கில் படையினரின் கட்டுப்பாட்டில் இருக்கும் மக்களின் காணிகள் தொடர்பிலும் பேசினோம். காணிகள் பல விடுவிக்கப்பட்டிருந்தாலும் ஏனைய காணிகளும் விடுவிக்கப்பட வேண்டும் எனவும், அப்போதுதான் மீள்குடியேற்றம் முழுமை பெறும் எனவும் குறிப்பிட்டேன் என்றார்.