'டிரெகன்' தொடர்பில் ஆராய்ச்சி நடத்துமாறு ‍கோரி 8 வயது சிறுமியொருவர் நியூஸிலாந்துப் பிரதமருக்கு 5 நியூஸிலாந்து டொலர்களை இலஞ்சமாக அனுப்பி வைத்துள்ளார். 

நியூஸிலாந்து நாட்டுப் பிரதமர் ஜெசிந்தாவுக்கு அந் நாட்டைச் சேர்ந்த விக்டோரிய எனும் மேற்படி சிறுமி கடிதமொன்றை அனுப்பி வைத்துள்ளார்.

அந்தக் கடிதத்தில் அவர்,  தான் ‘டிரெகன்’களுக்கு பயிற்சி அளிக்க விரும்புவதாகவும், எனவே அரசு சார்பில் ‘டிரெகன்’ குறித்து ஆய்வு மேற்கொள்ள வேண்டும் என்றும் சுட்டிக்காட்டியுள்ளார்.

அது மாத்திரமன்றி அந்தக் கடிதத்துடன் 5 நியூஸிலாந்து டொலர்ளையும் இணைத்து அனுப்பி வைத்துள்ளார்.

இந்தக் கடிதத்திற்கு மதிப்பளித்த நியூஸிலாந்துப் பிரதமர், அவரது கைப்பட பதில் கடிதம் ஒன்றை எழுதி அந்த சிறுமிக்கு அனுப்பி வைத்துள்ளார்.

அந்தக் கடிதத்தில் பிரதமர், டிரெகன்கள் மற்றும் உளவியல் குறித்த உங்களது ஆலோசனைகளை கேட்க நாங்கள் ஆர்வமாக இருக்கிறோம். ஆனால் துரதிர்ஷ்டவசமாக அது குறித்து எந்த பணிகளையும் நாங்கள் மேற்கொள்ள முடியவில்லை.

நீங்கள் அளித்த இலஞ்சத்தை என்னால் ஏற்று கொள்ளமுடியாது. அதனால் அதை திருப்பி தந்துவிடுகிறேன். எனினும் டிரெகன்கள் மற்றும் நுண்ணுணர்வு குறித்து உங்களது தேடலுக்கு எனது வாழ்த்துக்கள் எனவும் குறிப்பிட்டுள்ளார்.