ரஷ்யாவில் இராணுவ வீரர்கள்  முகநூல்,டுவிட்டர்’ உள்ளிட்ட சமூக வலைத்தளங்களை பயன்படுத்த தடைசெய்யவுள்ளதாக அந்நாட்டு தகவல்கள் தெரிவித்துள்ளன. 

இதனால் இராணுவம் குறித்த இரகசிய தகவல்கள் பொதுவெளியில் கசிவதாக தொடர் குற்றச்சாட்டுகள் எழுந்தன. எனவே இராணுவ வீரர்கள் “ஸ்மார்ட்” கையடக்க தொலைபேசி  பயன்படுத்த தடைவிதிக்க வேண்டுமென இராணுவ அதிகாரிகள் வலியுறுத்தினர்.

அந்த வகையில் இராணுவ வீரர்கள் “ஸ்மார்ட்” கையடக்க தொலைபேசி  பயன்படுத்த தடைவிதிக்கும் மசோதா பாராளுமன்ற கீழ் சபையில் தாக்கல் செய்யப்பட்டது. அதனை தொடர்ந்து அந்த மசோதா மீது வாக்கெடுப்பு நடத்தப்பட்டது. மொத்தம் உள்ள 450 உறுப்பினர்களில் 400 க்கும் மேற்பட்டோர் மசோதாவுக்கு ஆதரவாக வாக்களித்தனர். எனவே மசோதா வெற்றிகரமாக நிறைவேறியது.

எனினும் இந்த மசோதா பாராளுமன்ற மேல்சபையிலும், கூட்டமைப்பு கவுன்சிலிலும் நிறைவேற வேண்டும்.அதனை தொடர்ந்து அதிபர் புதின் அந்த மசோதாவில் கையெழுத்திட்டு பின்னர் சட்டமாக இயற்றப்பட்டு அமலுக்கு வரும்.

இந்த சட்டம் அமலுக்கு வந்தால் கேமரா, இணையதளம் உள்ளிட்ட வசதிகளை கொண்ட “ஸ்மார்ட்”கையடக்க தொலைபேசி  மட்டும் இன்றி  மடி கணினி உள்ளிட்டவற்றையும் பயன்படுத்த இராணுவ வீரர்களுக்கு தடைவிதிக்கப்படும். அத்துடன் அவர்கள் இராணுவம் குறித்து பத்திரிகையாளர்களிடம் பேசவும், எழுதவும் தடை வரும் என தெரிவிக்கப்பட்டுள்ளது.