(நா.தனுஜா)

எதிர்வரும் சுதந்திர தினத்திற்கு முன்பாக கலகொட அத்தே ஞானசார தேரரை விடுவிப்பதற்கு நடவடிக்கை எடுக்குமாறு கோரி ஜனாதிபதி மைத்திரிபால சிறிசேனவிடம் வேண்டுகோள் விடுப்பதற்கு தீர்மானித்துள்ளதாக ஸ்ரீலங்கா சுதந்திரக் கட்சியினர் தெரிவித்துள்ளனர்.

நீதிமன்ற அவமதிப்பு குற்றத்திற்காக சிறையில் அடைக்கப்பட்டுள்ள பொதுபலசேனா அமைப்பின் பொதுச் செயலாளர் ஞானசார தேரர் பாரியதொரு குற்றத்தைப் புரிந்தவர் அல்ல. அவர் நாட்டுக்காகவும், இராணுவ வீரர்களுக்காகவும், இனங்களுக்கு இடையிலான நல்லிணக்கத்திற்காகவும் தொடர்ந்து குரல் கொடுத்து வந்தவராவார். எனவே அவரை விடுவிப்பதில் தவறில்லை எனக் கருதுவதனாலேயே இந்த தீர்மானத்தை சுதந்திரக் கட்சியினர் எடுத்தாகவும் அக் கட்சியின் பாராளுமன்ற உறுப்பினர் துமிந்த திஸாநாயக்க குறிப்பிட்டார்.