(நா.தனுஜா)

இலங்கையில் இடம்பெற்ற போர்க்குற்றங்கள் தொடர்பிலான உண்மைகளை வெளிப்படுத்தல் மற்றும் நீதி வழங்கல் பொறிமுறை என்பன குறித்த கடப்பாட்டினை  அங்கு ஏற்பட்ட அரசியல் நெருக்கடி நிலைமையானது வலுவிழக்கச் செய்துள்ளது. 

இந்நிலையானது நியாயாதிக்கத்தை உறுதி செய்வதற்கு முறையான நடவடிக்கைகள் எவற்றையும் மேற்கொள்ளாத அரசாங்கத்தின் தோல்வியை எடுத்துக்காட்டுவதாக அமைந்துள்ளது.

நீதி வழங்கல் தொடர்பான வாக்குறுதிகளை நிறைவேற்றும் கடப்பாடு அரசியல் நெருக்கடியினால் வலுவிழந்துள்ள நிலையில் நீண்டகாலமாக துன்பங்களை அனுபவித்துவரும் மக்கள் தொடர்பான தமது கடப்பாடுகளை விரைந்து நிறைவேற்றுவது தொடர்பில் இலங்கையின் நட்புறவு நாடுகள் மற்றும் அமைப்புக்கள் இலங்கை அரசாங்கத்திற்கு அழுத்தம் வழங்க வேண்டும் என மனித உரிமைகள் கண்காணிப்பகம் தெரிவித்துள்ளது.

மனித உரிமைகள் கண்காணிப்பகம் 2019 ஆம் ஆண்டுக்கான உலக அறிக்கையை வெளியிட்டு வைத்தபோதே மேற்கண்ட விடயம் சுட்டிக்காட்டப்பட்டுள்ளது.