சபைக்கு டோச் லைட்டுடன் வந்த சிசிர ஜெயக்கொடி எம்.பி.

சபைக்கு டோச்லைட்டை எடுத்துவந்த ஐக்கிய மக்கள் சுதந்திர முன்னணியின் எம்.பி.யான சிசிர ஜெயக்கொடி பாராளுமன்ற உறுப்பினர்களுக்கு டோச்லைட் வழங்குவத ற்கு நடவடிக்கை எடுக்கவேண்டுமென சபாநாயகரிடத்தில் கோரிக்கை விடுத்தார்.

நேற்று புதன்கிழமை மின்வலு மற்றும் புதிப்பிக்கத்தக்க சக்தி அமைச்சர் ரஞ்சித் சியம்பலாபிட்டிய அண்மையில் ஏற்பட்ட மின்துண்டிப்பு அதனுடன் தொடர்புடைய விடயங்கள் தொடர்பாக பாராளுமன்றுக்கு அறிக்கை சமர்ப்பித்து உரையாற்றினார்.

அவருடைய நீண்ட உரை நிறைவடைந்த பின்னர் ஒழுங்குப்பிரச்சினையை எழுப்பிய சிசிர ஜெயக்கொடி எம்.பி. தனது கையில் வைத்திருந்த டோச் லைட்டை ஒளிரச் செய்தார். அமைச்சர் குறிப்பிட்டதைப்போன்று எதிர்காலத்தில் மின்துண்டிப்பு இடம்பெறாது என்பதை உறுதியான கூற்றாக ஏற்றுக்கொள்ள முடியாது. எதிர்காலத்தில் மின்துண்டிப்பு ஏற்படுவதற்கான நிலைமைகளே காணப்படுகின்றன.

ஆகவே அவரின் கூற்றை ஏற்றுக்கொள்ள முடியாது. எனவே இதுபோன்ற டோச் லைட்டுக்களை பாராளுமன்ற உறுப்பினர்களுக்கு வழங்கவேண்டுமென சபாநாயகரிடத்தில் கோரிக்கை விடுத்தார்.

அக்கோரிக்கை விடுத்த சந்தர்ப்பத்தில் அமைச்சர் மற்றும் சபாநாயகரை நோக்கி டோச் லைட்டை ஒளிரச்செய்திருந்தமை குறிப்பிடத்தக்கது.