தவறவிடாதீர்கள்..!உடனே பதிவு செய்யுங்கள்

சீரற்ற காலநிலை காரணமாக இதுவரை 5 பேர் உயிரிழந்துள்ளதுடன் 10 ஆயிரத்திற்கும் மேற்பட்டோர் பாதிக்கப்பட்டுள்ள நிலையில் ஒருவர் காணாமல் போயுள்ளதாக அனர்த்த முகாமைத்தவ மத்திய நிலையம் தெரிவித்துள்ளது.

இதேவேளை, பதுளை, களுத்துறை, காலி மற்றும் கேகாலை மாவட்டங்களுக்கு விடுக்கப்பட்டிருந்த மண்சரிவு எச்சரிக்கை தொடர்ந்து அமுலில் இருப்பதாக அனர்த்த  முகாமைத்துவ மத்திய நிலையம் அறிவித்துள்ளது.

நாட்டில் நிலவும் சீரற்ற காலநிலையில் காரணமாக நாட்டில் பெரும்பாலான பகுதிகளில் பொது மக்கள் பெரிதும் பாதிக்கப்பட்டுள்ளனர்.

இந்த காலநிலையினால் காலி, களுத்துறை, கொழும்பு ஆகிய மாவட்டங்களில் 6 ஆயிரத்து 89 குடும்பங்களைச் சேர்ந்த 23,243 பேர் பாதிக்கப்பட்டுள்ளதாக தேசிய அனர்த்த நிவாரண சேவை மத்திய நிலையத்தின் பணிப்பாளர் சமிந்த பதிராஜா தெரிவித்துள்ளார்.

முழுமையாக பாதிக்கப்பட்ட வீடுகளின் எண்ணிக்கையும் வர்த்தக நிலையங்களின் எண்ணிக்கையும் 9 ஆகும் என்று பணிப்பாளர் மேலும் தெரிவித்தார்.

ஓரளவுக்கு பாதிக்கப்பட்ட வீடுகளின் எண்ணிக்கை 297 ஆகும். பாதிக்கப்பட்ட மாவட்டங்களில் 3 நலன்புரி முகாம்கள் பாதிப்படைந்த மக்கள் தங்குவதற்காக அமைக்கப்பட்டுள்ளன. இவற்றில் 16 குடும்பங்களைச் சேர்ந்த 62 பேர் தங்கியுள்ளனர்.

தற்போது நிலவும் மழையுடன் கூடிய காலநிலை நாளையும் வலுவடையக்கூடும் என்று வளிமண்டலவியல் திணைக்களம் தெரிவித்துள்ளது.

நாட்டின் பெரும்பாலான பிரதேசங்களில் பிற்பகல் 2 மணிக்கு பின்னர் மழை அல்லது இடியுடன் கூடிய மழை பெய்யக்கூடும் என குறிப்பிடப்பட்டுள்ளமை குறிப்பிடத்தக்கது.